ഇന്ത്യന്‍ താരങ്ങള്‍ക്ക് വിശ്രമം; ഐപിഎല്ലിന് തിരിച്ചടിയാവും
സൂപ്പര്‍ കിങ്‌സിനും ഒഴിച്ചുകൂടാനാവത്ത താരമാണ് ജഡേജ.
മുംബൈ: തുടര്‍ച്ചയായ പരിക്കേല്‍ക്കുന്ന ഇന്ത്യന്‍ താരങ്ങള്‍ക്ക് വിശ്രമം നല്‍കാനുള്ള ബിസിസിഐയുടെ തീരുമാനം കൂടുതല്‍ തിരിച്ചടിയാവുന്നത് ഐപിഎല്ലിന്. അമിത ജോലി ഭാരമാണ് താരങ്ങള്‍ക്ക് തുടര്‍ച്ചയായി പരിക്കേല്‍ക്കുന്നതിന് പിന്നില്ലെന്നാണ് ബിസിസിഐയുടെ വിലയിരുത്തല്‍. ഈ വര്‍ഷം ഇന്ത്യയില്‍ നടക്കുന്ന ലോകകപ്പിനായി 20 അംഗ സാധ്യതാ ടീമിനെ ബിസിസിഐ കഴിഞ്ഞ ദിവസം തിരഞ്ഞെടുത്തിരുന്നു. ഈ താരങ്ങളെ ഐസിസി ഇവന്റുകളില്‍ മാത്രം പങ്കെടുപ്പിക്കുകയും ഐപിഎല്ലില്‍ നിന്ന് മാറ്റിനിര്‍ത്താനുമാണ് ബിസിസിഐയുടെ ആലോചന. എന്നാല്‍ ഐപിഎല്‍ ഫ്രാഞ്ചൈസികള്‍ ഈ തീരുമാനം എതിര്‍ക്കുമെന്നുറപ്പാണ്.
പരിക്കിനെ തുടര്‍ന്ന് കഴിഞ്ഞ സീസണിലെ നിരവധി മല്‍സരങ്ങള്‍ നഷ്ടമായ ജസ്പ്രീത് ബുംറ, രവീന്ദ്ര ജഡേജ എന്നിവരെ ഐപിഎല്ലിന് വിട്ടുകൊടുക്കേണ്ട എന്ന നിഗമനത്തിലാണ് ബിസിസിഐ. മുംബൈ ഇന്ത്യന്‍സിന്റെ തുരുപ്പ് ചീട്ടാണ് ബുംറ. ചെന്നൈ സൂപ്പര്‍ കിങ്‌സിനും ഒഴിച്ചുകൂടാനാവത്ത താരമാണ് ജഡേജ.