പനാമയ്‌ക്കെതിരായ മല്‍സരം; ആഘോഷമാക്കി അര്‍ജന്റീന; മെസ്സിക്ക് ഗോള്‍

ബ്യൂണസ് ഐറിസ്: ലോകകപ്പിന് ശേഷം ആദ്യമായി സ്വന്തം കാണികള്‍ക്ക് മുന്നില്‍ കളിക്കാനിറങ്ങിയ അര്‍ജന്റീനയ്ക്ക് പനാമയ്‌ക്കെതിരേ ജയം. എതിരില്ലാത്ത രണ്ട് ഗോളിനാണ് അര്‍ജന്റീനയുടെ ജയം. രണ്ടാം പകുതിയിലാണ് വാമോസിന്റെ രണ്ട് ഗോളും പിറന്നത്. ആദ്യ പകുതിയില്‍ പനാമ പ്രതിരോധം അര്‍ജന്റീനയെ പിടിച്ചുകെട്ടിയിരുന്നു. ഭീകരമായ ടാക്കിളുകളാണ് പനാമ നടത്തിയത്. മെസ്സിക്കെതിരേ ടാക്കിളിന് ശ്രമിച്ച പനാമ താരത്തിന് മഞ്ഞക്കാര്‍ഡും ലഭിച്ചിരുന്നു. തിയാഗോ അല്‍മാഡാ, ലയണല്‍ മെസ്സി എന്നിവരാണ് അര്‍ജന്റീനയുടെ സ്‌കോറര്‍മാര്‍. ഉഗ്രന്‍ ഫ്രീകിക്കില്‍ നിന്നാണ് മെസ്സിയുടെ ഗോള്‍. 83,000 കാണികളാണ് മല്‍സരത്തിനുണ്ടായത്. സ്റ്റേഡിയം നിറഞ്ഞ് കവിഞ്ഞിരുന്നു. ലോകകപ്പ് നേടിയ ടീമിന് സ്റ്റേഡിയത്തില്‍ വന്‍ സ്വീകരണവും നല്‍കി.ആഘോഷരാവായിരുന്നു സ്‌റ്റേഡിയത്തില്‍ നടന്നത്. നിറഞ്ഞ കവിഞ്ഞ ആരാധകരുടെ സ്വീകരണം കണ്ട സൂപ്പര്‍ താരം മെസ്സി കണ്ണീരണിയുകയും ചെയ്തിരുന്നു.