ഐഎസ്എല്‍; കൊമ്പന്‍മാര്‍ തലപ്പത്ത്; ഹൈദരാബാദ് വീണു

പനാജി: ഇന്ത്യന്‍ സൂപ്പര്‍ ലീഗില്‍ കേരളാ ബ്ലാസ്റ്റേഴ്‌സ് ഒന്നാം സ്ഥാനത്ത്. ഇന്ന് നടന്ന തകര്‍പ്പന്‍ മല്‍സരത്തില്‍ ഹൈദരാബാദ് എഫ് സിയെ എതിരില്ലാത്ത ഒരു ഗോളിനാണ് ബ്ലാസ്‌റ്റേഴ്‌സ് മറികടന്നത്. രണ്ടാം സ്ഥാനത്തുള്ള ഹൈദരാബാദ് എഫ്‌സിക്കെതിരേ 42ാം മിനിറ്റില്‍ അല്‍വാരോ വാസ്‌ക്വസാണ് സ്‌കോര്‍ ചെയ്തത്. തോല്‍വിയോടെ ഹൈദരാബാദ് മൂന്നാം സ്ഥാനത്തേക്ക് വീണു.ബ്ലാസ്‌റ്റേഴ്‌സിനും രണ്ടാം സ്ഥാനത്തുള്ള മുംബൈ സിറ്റിക്കും 17 പോയിന്റ് വീതമാണുള്ളത്.

 മല്‍സരത്തിന്റെ തുടക്കം മുതല്‍ ഇരുടീമും മികച്ച മുന്നേറ്റങ്ങളാണ് നടത്തിയത്. 42ാം മിനിറ്റില്‍ ഖാബ്രയുടോ ത്രോ സഹല്‍ ഹെഡ് കൊണ്ട് ഫ്‌ളിക്ക് ചെയ്തു. വോളിയിലൂടെ വാസ്‌കസ് ഗോളാക്കുകയായിരുന്നു. താരത്തിന്റെ സീസണിലെ നാലാം ഗോളാണ്.

രണ്ടാം പകുതിയില്‍ ഹൈദരാബാദ് കൂടുതല്‍ ആക്രമണം നടത്തി. എങ്കിലും ബ്ലാസ്റ്റേഴ്‌സ് പ്രതിരോധത്തിന് മുന്നില്‍ പിടിച്ചുനില്‍ക്കാനായില്ല. സീസണില്‍ ഏറ്റവും സ്ഥിരതയോടെ കളിക്കുന്ന ടീമിനെയാണ് കേരളം ഇന്ന് തകര്‍ത്തത്.