കേരള ബ്ലാസ്റ്റേഴ്സ് താരങ്ങള്‍ അണ്ടര്‍ -16 ഇന്ത്യന്‍ ടീം ക്യാംപില്‍
ഏപ്രിലില്‍ കേരളത്തില്‍ നടന്ന സെലക്ഷന്‍ ട്രയലിലും, മേയ് മാസം കല്‍ക്കത്തയില്‍ നടന്ന ഹീറോ ജൂനിയര്‍ ലീഗിലും നടത്തിയ മികച്ച പ്രകടനമാണ് ഇരുവരെയും ഇന്ത്യന്‍ ക്യാംപില്‍ എത്തിച്ചത്
കൊച്ചി:കേരള ബ്ലാസ്റ്റേഴ്സ് ജൂനിയര്‍ താരങ്ങളായ തൃശൂര്‍ സ്വദേശി വിബിന്‍ മോഹന്‍, കാസര്‍കോട് സ്വദേശി ആദില്‍ അബ്ദുല്ല എന്നിവര്‍ അണ്ടര്‍- 16 ദേശിയ ഫുട്‌ബോള്‍ ക്യാംപിലേക്ക് തിരഞ്ഞെടുക്കപ്പെട്ടു.നാളെ മുതല്‍ ഭുവനേശ്വറില്‍ ക്യാംപ് ആരംഭിക്കും.ഏപ്രിലില്‍ കേരളത്തില്‍ നടന്ന സെലക്ഷന്‍ ട്രയലിലും, മേയ് മാസം കല്‍ക്കത്തയില്‍ നടന്ന ഹീറോ ജൂനിയര്‍ ലീഗിലും നടത്തിയ മികച്ച പ്രകടനമാണ് ഇരുവരെയും ഇന്ത്യന്‍ ക്യാംപില്‍ എത്തിച്ചത്. വിബിനും , ആദിലും മികച്ച സാങ്കേതിക മികവും , ഒത്തിണക്കവും ഉള്ള കളിക്കാരാണെന്നും അവര്‍ അണ്ടര്‍ 16 ഇന്ത്യന്‍ ടീമിലെത്തുമെന്നാണ് കരുതുന്നതെന്നും കേരള ബ്ലാസ്റ്റേഴ്സിന്റെ അണ്ടര്‍ 15 ടീം പരിശീലകനായ ഷമീല്‍ ചെമ്പകത്തില്‍ പറഞ്ഞു.