സന്തോഷ് ട്രോഫിയില്‍ കേരളം ഇന്ന് മഹാരാഷ്ട്രയ്‌ക്കെതിരേ; ജയം അനിവാര്യം
മല്‍സരങ്ങള്‍ ഫാന്‍ കോഡ് ആപ്പിലും ഇന്ത്യന്‍ ഫുട്‌ബോള്‍ യൂട്യൂബ് ചാനലിലും കാണാം.
ഭുവനേശ്വര്‍: സന്തോഷ് ട്രോഫിയില്‍ ഇന്ന് കേരളം മഹാരാഷ്ട്രയ്‌ക്കെതിരേ ഇറങ്ങും. ആദ്യ മല്‍സരത്തില്‍ ജയിച്ച കേരളം രണ്ടാം മല്‍സരത്തില്‍ കര്‍ണ്ണാടകയോട് ഞെട്ടിക്കുന്ന തോല്‍വി വഴങ്ങിയിരുന്നു. സെമി പ്രതീക്ഷ സജീവമാക്കാന്‍ കേരളത്തിന് ഇന്ന് ജയം അനിവാര്യമാണ്. മറുവശത്ത് മഹാരാഷ്ട്രയാവട്ടെ മോശം ഫോമിലാണ് നീങ്ങുന്നത്. പോയിന്റ് നിലയില്‍ കേരളത്തിന് താഴെ നാലാം സ്ഥാനത്താണ് മഹാരാഷ്ട്ര. ഇന്ന് ഒഡീഷയില്‍ രാത്രി 7.30നാണ് മല്‍സരം. മല്‍സരങ്ങള്‍ ഫാന്‍ കോഡ് ആപ്പിലും ഇന്ത്യന്‍ ഫുട്‌ബോള്‍ യൂട്യൂബ് ചാനലിലും കാണാം.
ഗോവയ്‌ക്കെതിരായ ഇഞ്ചോടിഞ്ച് പോരാട്ടത്തില്‍ ഒ എം ആസിഫാണ് കേരളത്തിന്റെ രക്ഷകനായത്. ആദ്യ പകുതിയില്‍ നിജോ ഗില്‍ബര്‍ട്ടും രണ്ടാം പകുതിയുടെ തുടക്കത്തില്‍ റിസ്വാന്‍ അലിയുമാണ് കേരളത്തിന് ലീഡ് നല്‍കിയത്. എന്നാല്‍ മുഹമ്മദ് ഹഫീസിലൂടെ രണ്ട് ഗോള്‍ ഗോവ തിരിച്ചടിച്ച് മല്‍സരം സമനിലയിലാക്കി. പകരക്കാരനായെത്തിയ ആസിഫ് ഇഞ്ചുറി ടൈമില്‍ കേരളത്തിന്റെ രക്ഷകനാവുകയായിരുന്നു. ഒടുവില്‍ 3-2ന് കേരളം മല്‍സരം സ്വന്തമാക്കുകയായിരുന്നു. 20ാം മിനിറ്റില്‍ അഭിഷേക് ശര്‍മ്മയാണ് കേരളത്തിനെതിരേ കര്‍ണ്ണാടകയ്ക്കായി സ്‌കോര്‍ ചെയ്തത്. കേരളത്തിന്റെ അപ്രതീക്ഷിത തോല്‍വിയായിരുന്നു.