മാഞ്ചസ്റ്റര്‍: ന്യൂകാസിലിനെ 2-0ത്തിന് തോല്‍പ്പിച്ച് ആഴ്‌സണല്‍ ഇംഗ്ലിഷ് പ്രീമിയര്‍ ലീഗിലെ ടോപ് ഫോറില്‍ പ്രവേശിച്ചു. ആരോണ്‍ രാംസേ(30), ലക്കാസെറ്റേ(83) എന്നിവരുടെ ഗോളോടെയാണ് ആഴ്‌സണല്‍ ജയം കണ്ടത്. എമിറേറ്റസ് സ്‌റ്റേഡിയത്തില്‍ നടന്ന മല്‍സരത്തില്‍ പൂര്‍ണ്ണാധിപത്യം ഏറ്റെടുത്തായിരുന്നു ആഴ്‌സണലിന്റെ പ്രകടനം. രാംസേയുടെ സീസണിലെ അഞ്ചാം ഗോളാണിത്. ലകാസെറ്റെ സീസണില്‍ 13 ഗോള്‍ നേടിയിട്ടുണ്ട്. ജയത്തോടെ ആഴ്‌സണല്‍ മൂന്നാം സ്ഥാനത്താണുള്ളത്. ടോട്ടന്‍ഹാം നാലിലേക്കും മാഞ്ചസ്റ്റര്‍ യുനൈറ്റഡ് അഞ്ചാം സ്ഥാനത്തേക്കും നീങ്ങി. ഏതാനും മല്‍സരങ്ങള്‍ അവസാനിക്കെ കിരീടപോരാട്ടത്തിനും ടോപ് ഫോറിനുമായി കനത്ത പോരാട്ടമാണ് ലീഗില്‍ നടക്കുന്നത്. ഇന്ന് അര്‍ദ്ധരാത്രി നടക്കുന്ന മല്‍സരത്തില്‍ വാറ്റ്‌ഫോര്‍ഡ് ഫുള്‍ഹാമിനെയും വൂള്‍വ്‌സ് മാഞ്ചസ്റ്റര്‍ യുനൈറ്റഡിനെയും നേരിടും.