ന്യൂയോര്‍ക്ക്: യു എസ് ഓപ്പണില്‍ നിന്ന് ലോക മൂന്നാം നമ്പര്‍ താരം സ്‌പെയിനിന്റെ കാര്‍ലോസ് അല്‍കാരസ് രണ്ടാം റൗണ്ടില്‍ തോറ്റ് പുറത്തായതിന് പിന്നാലെ ലോക രണ്ടാം നമ്പര്‍ താരം നൊവാക് ജോക്കോവിച്ചും പുറത്ത്. മൂന്നാം റൗണ്ട് പോരാട്ടത്തില്‍ ഓസ്‌ട്രേലിയന്‍ താരം 28-ാം സീഡ് അലക്‌സി പോപിറിനാണ് ജോക്കോവിച്ചിനെ അട്ടിമറിച്ചത്. സ്‌കോര്‍ 6-4, 6-4, 2-6, 6-4.
ആദ്യ രണ്ട് സെറ്റുകള്‍ നഷ്ടമായതിന് പിന്നാലെ മൂന്നാം സെറ്റില്‍ ശക്തമായി തിരിച്ചുവന്ന ജോക്കോവിച്ചിന് പക്ഷെ നാലാം സെറ്റില്‍ കാലിടറി. 6-4ന് സെറ്റും മത്സരവും സ്വന്തമാക്കി പോപിറിന് സെറ്റും മത്സരവും സ്വന്തമാക്കി. 25-ാം ഗ്രാന്‍സ്ലാം കിരീടവുമായി ചരിത്രം സൃഷ്ടിക്കാമെന്ന ജോക്കോവിച്ചിന്റെ മോഹങ്ങള്‍ കൂടിയാണ് യുഎസ് ഓപ്പണ്‍ മൂന്നാം റൗണ്ടില്‍ പോപിറിന് മുന്നില്‍ വീണടുഞ്ഞത്. നിലവില്‍ വനിതാ താരം മാര്‍ഗരറ്റ് കോര്‍ട്ടിന്റെ 24 ഗ്രാന്‍സ്ലാം കിരീടങ്ങളെന്ന നേട്ടത്തിനൊപ്പമാണ് ജോക്കോവിച്ച്.