ബഗ്ദാദിലെ ആശുപത്രിയില്‍ ഓക്‌സിജന്‍ ടാങ്കുകള്‍ പൊട്ടിത്തെറിച്ച് തീപ്പിടിത്തം; 19 മരണം
ബഗ്ദാദ്: ഇറാഖിലെ ബഗ്ദാദില്‍ ആശുപത്രിയിലുണ്ടായ തീപ്പിടിത്തത്തില്‍ 19 പേര്‍ മരിച്ചു. ശനിയാഴ്ച രാത്രിയിലാണ് സംഭവമുണ്ടായത്. ഓക്‌സിജന്‍ ടാങ്കുകള്‍ പൊട്ടിത്തെറിച്ചതാണ് അപകടകാരണം. നിരവധി പേര്‍ക്ക് അപകടത്തില്‍ പരിക്കേല്‍ക്കുകയും ചെയ്തിട്ടുണ്ട്. രക്ഷാപ്രവര്‍ത്തനം പുരോഗമിക്കുകയാണെന്ന് രണ്ട് ആരോഗ്യ ഉദ്യോഗസ്ഥരെ ഉദ്ധരിച്ച് സിഎന്‍എന്‍ റിപോര്‍ട്ട് ചെയ്തു.
ഇബ്‌നുല്‍ ഖത്തീബ് ആശുപത്രിയില്‍ നടന്ന സ്‌ഫോടനത്തില്‍ എത്രപേര്‍ക്ക് പരിക്കേറ്റെന്ന് കണ്ടെത്താന്‍ ഉദ്യോഗസ്ഥര്‍ ശ്രമിക്കുകയാണെന്ന് അവര്‍ പറയുന്നു. തെക്ക് കിഴക്കന്‍ ബഗ്ദാദിലെ ആശുപത്രിയിലേക്ക് ഇറാഖിലെമ്പാടുനിന്നുമുള്ള ആളുകളെ റഫര്‍ ചെയ്യുന്നുണ്ട്. അതില്‍ കൊവിഡ് രോഗമുള്ളവരും ഉള്‍പ്പെടുന്നു. സംഭവത്തില്‍ ഇറാഖ് പ്രസിഡന്റ് മുസ്തഫ അല്‍ ഖദിമി ദു:ഖം രേഖപ്പെടുത്തി. മരിച്ചവരുടെ കുടുംബങ്ങളുടെ ദു:ഖത്തില്‍ പങ്കുചേരുന്നുവെന്ന് അദ്ദേഹം പ്രതികരിച്ചു.