പട്ടിയെ ആക്രമിച്ച് പുലി; ഒടുവില്‍ വിജയിയായി പട്ടി: രാജസ്ഥാനില്‍ നിന്നുള്ള ദൃശ്യം വൈറല്‍ (വീഡിയോ)

ജയ്പൂര്‍: ടൂറിസ്റ്റ് അപ്പാര്‍ട്ട്‌മെന്റില്‍ കയറിയ പുലി വളര്‍ത്തുപട്ടിയെ ആക്രമിച്ചു. പോരാട്ടത്തിനൊടുവില്‍ ഉടമയുടെ കരച്ചിലിന്റെ സഹായത്തോടെ പുലിയെ തുരത്തി പട്ടി വിജയിച്ചു. രാജസ്ഥാനിലെ മൗണ്ട് അബു പ്രദേശത്തെ സണ്‍റൈസ് വാലിയിലെ ടൂറിസ്റ്റ് അപ്പാര്‍ട്ട്‌മെന്റിലാണ് സംഭവം. ലാബ്രഡോര്‍ റിട്രീവര്‍ ഇനത്തില്‍ പെട്ട പട്ടിയാണ് പുലിയുമായി ഏറ്റുമുട്ടിയത്.

അപ്പാര്‍ട്ട്‌മെന്റിലെ പൂന്തോട്ടത്തില്‍ പട്ടി നടക്കുന്നതിന്റെ ആക്രമിക്കപ്പെടുന്നതിന്റെയും സിസിടിവി ദൃശ്യങ്ങള്‍ പുറത്തുവന്നു. പൂന്തോട്ടത്തില്‍ പട്ടി നടക്കുന്നതിന്റെ ദൃശ്യങ്ങളാണ് ആദ്യം കാണുന്നത്. പെട്ടെന്ന് പുലി പുറകിലൂടെയെത്തി ആക്രമിക്കുകയായിരുന്നു. പട്ടിയുടെ കഴുത്തില്‍ പല്ലുകള്‍ കുത്തികയറ്റാന്‍ പുലി ശ്രമിച്ചു. പുലിയുടെ കടിയില്‍ നിന്ന് രക്ഷപ്പെടാന്‍ പട്ടിയും ശ്രമിച്ചു.

പോരാട്ടം തുടരുമ്പോള്‍ ഉമയായ സ്ത്രീയുടെ കരച്ചില്‍ പുലിയുടെ ശ്രദ്ധ തെറ്റിച്ചു. ഇതോടെ പട്ടിയെ വിട്ട് പുലി ഓടിരക്ഷപ്പെടുകയായിരുന്നു. പുലിക്ക് പിന്നാലെ പോയ പട്ടി പിന്നീട് ഉടമയുടെ അടുത്തേക്ക് തിരിച്ചുവന്നു. പട്ടിയെ ഉടമ അപ്പാര്‍ട്ട്‌മെന്റിന് അകത്തേക്ക് കൊണ്ടുപോയി.