എന്‍സിപി വനിതാ നേതാവിനെ നടു റോഡില്‍ കഴുത്തറുത്ത് കൊന്നു
എന്‍സിപി വനിതാ വിഭാഗം അധ്യക്ഷ 39കാരിയായ രേഖ ഭൗസാഹേബ് ജാരെയാണ് കൊല്ലപ്പെട്ടത്.
മുംബൈ: മഹാരാഷ്ട്രയില്‍ എന്‍സിപി വനിതാ നേതാവിനെ ബൈക്കിലെത്തിയ അക്രമി സംഘം കഴുത്തറുത്ത് കൊന്നു. എന്‍സിപി വനിതാ വിഭാഗം അധ്യക്ഷ 39കാരിയായ രേഖ ഭൗസാഹേബ് ജാരെയാണ് കൊല്ലപ്പെട്ടത്. ഇവര്‍ സഞ്ചരിച്ച വാഹനം ബൈക്കിനെ ഓവര്‍ടേക്ക് ചെയ്തതതുമായി ബന്ധപ്പെട്ട തര്‍ക്കമാണ് കൊലപാതകത്തില്‍ കലാശിച്ചതെന്ന് പോലിസ് പറഞ്ഞു.
സംഭവത്തില്‍ കണ്ടാലറിയാവുന്ന പ്രതികള്‍ക്കെതിരേ കേസെടുത്ത് അന്വേഷണം ആരംഭിച്ചു.തിങ്കളാഴ്ച അഹമ്മദ്‌നഗര്‍ ജില്ലയിലാണ് സംഭവം. രേഖ പുനെയില്‍ നിന്ന് അമ്മ, മകന്‍, സുഹൃത്ത് എന്നിവര്‍ക്കൊപ്പം കാറില്‍ അഹമ്മദ് നഗറിലേക്ക് പോകുന്ന വഴിയാണ് ആക്രമണം ഉണ്ടായത്.
രേഖയുടെ കാര്‍ അക്രമി സംഘം സഞ്ചരിച്ചിരുന്ന ബൈക്കിനെ മറികടന്നതോടെ ക്രുദ്ധരായ സംഘം നടുറോഡില്‍ ബൈക്ക് ബൈക്ക് കുറുകെയിട്ട് കാര്‍ നിര്‍ത്തിക്കുകയായിരുന്നു. തുടര്‍ന്ന് ഉണ്ടായ വാക്കേറ്റത്തിനിടെ അക്രമി സംഘത്തിലൊരാള്‍ കത്തിയെടുത്ത് രേഖയുടെ കഴുത്ത് മുറിക്കുകയായിരുന്നു.രേഖയുടെ ബന്ധുക്കള്‍ ഇടപെടാന്‍ ശ്രമിച്ചുവെങ്കിലും ഫലം ഉണ്ടായില്ലെന്ന് പോലിസ് പറയുന്നു. ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ലെന്ന് പോലിസ് പറഞ്ഞു.