സെക്രട്ടേറിയറ്റില്‍ പ്രവേശനവിലക്ക്; കെജ്‌രിവാളിന് കര്‍ശന ഉപാധികളോടെ ജാമ്യം
എന്നാല്‍, ഭരണസിരാകേന്ദ്രമായ സെക്രട്ടേറിയറ്റില്‍ പ്രവേശിക്കുന്നതിനും പ്രധാന ഫയലുകള്‍ ഒപ്പിടുന്നതിനും വിലക്ക് തുടരും.
ന്യൂഡല്‍ഹി: മദ്യനയ അഴിമതി ആരോപണക്കേസില്‍ ഡല്‍ഹി മുഖ്യമന്ത്രിയും എഎപി കണ്‍വീനറുമായ അരവിന്ദ് കെജ് രിവാളിന് സുപ്രിംകോടതി ജാമ്യം അനുവദിച്ചു. സിബിഐ രജിസ്റ്റര്‍ ചെയ്ത കേസിലാണ് ജസ്റ്റിസുമാരായ സൂര്യകാന്ത്, ഉജ്ജല്‍ ഭുയന്‍ എന്നിവര്‍ ഉള്‍പ്പെട്ട ബെഞ്ച് കര്‍ശന ഉപാധികളോടെ ജാമ്യം നല്‍കിയത്. കേസില്‍ രണ്ട് മാസമായി തിഹാര്‍ ജയിലില്‍ കഴിയുകയാണ് കെജ്‌രിവാള്‍. നേരത്തേ, ലോക്‌സഭാ തിരഞ്ഞെടുപ്പ് പ്രചാരണസമയത്ത് കെജ്‌രിവാളിന് ഇടക്കാല ജാമ്യം അനുവദിച്ചിരുന്നു.
അനന്തകാലം ജയിലിലിടുന്നത് ശരിയല്ലെന്നു ചൂണ്ടിക്കാട്ടിയാണ് സുപ്രിംകോടതി ജാമ്യം നല്‍കിയത്. എന്നാല്‍, ഭരണസിരാകേന്ദ്രമായ സെക്രട്ടേറിയറ്റില്‍ പ്രവേശിക്കുന്നതിനും പ്രധാന ഫയലുകള്‍ ഒപ്പിടുന്നതിനും വിലക്ക് തുടരും. കെജ് രിവാള്‍ ഇന്ന് തന്നെ തിഹാര്‍ ജയിലില്‍ നിന്നും പുറത്തിറങ്ങും. നേരത്തേ ഇഡി രജിസ്റ്റര്‍ ചെയ്ത കേസില്‍ കെജ് രിവാളിന് ജാമ്യം ലഭിച്ചിരുന്നു.