കുട്ടിക്കാനത്ത് തീര്‍ത്ഥാടകരുടെ ബസ് കാറിന് മുകളിലേക്ക് മറിഞ്ഞു; നാലുപേര്‍ക്ക് പരിക്ക്
ഇടുക്കി: കുട്ടിക്കാനത്ത് ശബരിമല തീര്‍ത്ഥാടകര്‍ സഞ്ചരിച്ച ബസ് നിയന്ത്രണം വിട്ട് കാറിനു മുകളിലേക്ക് മറിഞ്ഞ് നാലുപേര്‍ക്ക് പരിക്കേറ്റു. തമിഴ്‌നാട്ടില്‍നിന്നും അയ്യപ്പഭക്തരുമായി വന്ന ബസ്സാണ് മറിഞ്ഞത്. ശബരിമലയില്‍നിന്നും തിരികെ വരികയായിരുന്ന പോണ്ടിച്ചേരി സ്വദേശികളുടെ കാറിന് മുകളിലേക്കാണ് ബസ് മറിഞ്ഞത്. ശനിയാഴ്ച രാവിലെ 8.30 ഓടെ കുട്ടിക്കാനത്തിനും വളഞ്ഞാക്കാനത്തിനും മധ്യേയുള്ള വലിയ വളവുകളിലൊന്നിലാണ് അപകടമുണ്ടായത്.
ബസ് വളവ് തിരിക്കുന്നതിനിടെ നിയന്ത്രണം വിട്ട് എതിരെ വന്ന കാറിന് മുകളിലേയ്ക്ക് മറിയുകയായിരുന്നു. അപകടത്തില്‍ കാറിലുണ്ടായിരുന്ന പോണ്ടിച്ചേരി സ്വദേശികളായ നാലുപേര്‍ക്ക് പരിക്കേറ്റെങ്കിലും ആരുടെയും പരിക്ക് ഗുരുതരമല്ല. പരിക്കേറ്റവരെ മുണ്ടക്കയത്തെ ആശുപത്രിയിലേക്ക് മാറ്റി. അപകടത്തെ തുടര്‍ന്ന് ഏറെ നേരം ഇതുവഴിയുള്ള ഗതാഗതം സ്തംഭിച്ചെങ്കിലും പോലിസെത്തി ഗതാഗതം പുനസ്ഥാപിച്ചു. കുത്തിറക്കങ്ങളും വന്‍ വളവുകളും നിറഞ്ഞ കുട്ടിക്കാനം- മുണ്ടക്കയം റൂട്ടില്‍ തീര്‍ത്ഥാടകരുടെ തിരക്കേറിയതോടെ അപകടം വര്‍ധിച്ചിരിക്കുകയാണ്.