കോട്ടയം: വൈക്കം തലയോലപറമ്പ് പോസ്റ്റ് ഓഫിസില്‍ മോഷണം. 76,500 രൂപ കളവ് പോയി. ലോക്കര്‍ തകര്‍ക്കാനും ശ്രമമുണ്ടായി. പോസ്റ്റ് ഓഫിസിന് പിന്നിലെ വാതിലിന്റെ പൂട്ട് തകര്‍ത്താണ് കള്ളനെത്തിയത്. പോസ്റ്റ് ഓഫിസിലെ അലമാരയില്‍ സൂക്ഷിച്ചിരുന്ന 16,500 രൂപയും ജീവനക്കാരി മേശയ്ക്ക് അകത്ത് സൂക്ഷിച്ചിരുന്ന 60,000 രൂപയുമാണ് കള്ളന്‍ കൊണ്ടുപോയത്. ഫയലുകളും തപാല്‍ ഉരുപ്പടികളും അലങ്കോലമാക്കിയ നിലയിലാണ്. ലോക്കര്‍ തകര്‍ക്കാനുള്ള ശ്രമമുണ്ടായെങ്കിലും അത് നടന്നില്ല.
പോസ്റ്റ് ഓഫിസ് തൂത്തുവാരാനെത്തിയ ജീവനക്കാരിയാണ് വാതിലുകളുടെ പൂട്ട് തകര്‍ന്നുകിടക്കുന്നത് കണ്ടത്. സംഭവത്തില്‍ തലയോലപ്പറമ്പ് പോലിസ് കേസെടുത്ത് അന്വേഷണം ആരംഭിച്ചു. ഫോറന്‍സിക് വിദഗ്ധരും ഡോഗ് സ്‌ക്വാഡും സ്ഥലത്ത് പരിശോധന നടത്തി. മണം പിടിച്ച് നീങ്ങിയ പോലിസ് നായ വൈക്കം റോഡിലുള്ള ഷട്ടര്‍ ഇല്ലാത്ത കടമുറിയില്‍ കയറി നിന്നു. സമീപത്തെ ബാങ്കുകളുടെയും വ്യാപാര സ്ഥാപനങ്ങളുടെയും സിസിടിവി കാമറകള്‍ പോലിസ് പരിശോധിക്കുന്നുണ്ട്.