പൂജാ പാത്രത്തില്‍ നിന്ന് ബദാം മോഷ്ടിച്ചെന്ന്; 11 കാരനായ ദലിത് ബാലനെ കെട്ടിയിട്ട് മര്‍ദ്ദിച്ച് പൂജാരി (വീഡിയോ)

ഭോപ്പാല്‍: പൂജാ പാത്രത്തില്‍ നിന്ന് ബദാം മോഷ്ടിച്ചെന്ന് ആരോപിച്ച് ദലിത് ബാലനെ പൂജാരി കെട്ടിയിട്ട് മര്‍ദ്ദിച്ചു. സാഗറിലെ ജൈന ക്ഷേത്രത്തിലെ പണ്ഡിറ്റ് രാജേഷ് ജെയിനാണ് കുട്ടിയെ മര്‍ദ്ദിച്ചത്. കുട്ടിയെ കയറുപയോഗിച്ച് കെട്ടിയിടുന്നതിന്റേ വീഡിയോ സാമൂഹിക മാധ്യമങ്ങളില്‍ വ്യാപകമായി പ്രചരിക്കുന്നുണ്ട്. പൂജാ പാത്രത്തില്‍ നിന്നും ബദാം മോഷ്ടിച്ചതിനാണ് ദലിത് ബാലനെ കെട്ടിയിട്ടതെന്ന് രാജേഷ് ജെയിന്‍ പോലിസിനോട് പറഞ്ഞു. പൂജാരിയും മറ്റൊരാളും ചേര്‍ന്നാണ് കുട്ടിയെ കെട്ടിയിട്ടത്. സംഭവത്തില്‍ മോത്തി നഗര്‍ പോലിസ് എസ്‌സി-എസ്ടി ആക്ട് പ്രകാരം കുട്ടിയെ ബന്ദിയാക്കി ആക്രമിച്ചതിന് കേസെടുത്തിട്ടുണ്ട്.