പത്തനംതിട്ട: നടന്‍ ഗിന്നസ് പക്രുവിന്റെ കാര്‍ തിരുവല്ലയില്‍ അപകടത്തില്‍പ്പെട്ടു. പക്രു സഞ്ചരിച്ച ഇന്നോവ കാറും ലോറിയും തമ്മില്‍ കൂട്ടിയിടിക്കുകയായിന്നു. അപകടത്തില്‍ ആര്‍ക്കും പരിക്കില്ലെന്ന് പോലിസ് പറഞ്ഞു. തിരുവല്ല ബൈപാസില്‍ മഴുവങ്ങാടുചിറയ്ക്കു സമീപം പാലത്തില്‍ ഉച്ചയോടെയായിരുന്നു അപകടം.
തിരുവനന്തപുരത്തുനിന്നും എറണാകുളത്തേക്ക് പോവുകയായിരുന്ന പക്രുവിന്റെ വാഹനത്തില്‍ ചെങ്ങന്നൂര്‍ ഭാഗത്തേക്കുപോയ ലോറി മറ്റൊരു വാഹനത്തെ ഓവര്‍ടേക്ക് ചെയ്തപ്പോള്‍ ഇടിക്കുകയായിരുന്നു. ഇടിയുടെ ആഘാതത്തില്‍ ടയര്‍ പൊട്ടി കാര്‍ നിന്നതിനാല്‍ വലിയൊരു അപകടമാണ് ഒഴിവായതെന്ന് ദൃക്‌സാക്ഷികള്‍ പറയുന്നു. ഇവിടെ അപകടങ്ങള്‍ പതിവാണെന്നും കഴിഞ്ഞ ദിവസം ഒരു ആംബുലന്‍സ് അപകടത്തില്‍പ്പെട്ടിരുന്നുവെന്നും നാട്ടുകാര്‍ പറയുന്നു.