മാള(തൃശ്ശൂര്‍): മകന്റെ മരണവിവരം അറിഞ്ഞതിന് പിന്നാലെ അമ്മയും മരിച്ചു. കാവനാട് താമസിക്കുന്ന പാറേക്കാട്ട് പരേതനായ തോമസിന്റെ മകന്‍ ബിനോയിയും അമ്മ മേരിയുമാണ് മണിക്കൂറുകളുടെ ഇടവേളകളില്‍ മരിച്ചത്. ഇന്ന് രാവിലെയാണ് സംഭവം. എല്‍പി സ്‌കൂളിന് സമീപം ഇടിമില്ല് നടത്തിയിരുന്ന ബിനോയ് മഞ്ഞപ്പിത്തത്തെ തുടര്‍ന്ന് കുറച്ച് നാളുകളായി ചികില്‍സയിലായിരുന്നു. 42 കാരനായ ബിനോയ് തൃശ്ശൂര്‍ മെഡിക്കല്‍ കോളജില്‍ ചികിത്സയിലിരിക്കേയാണ് മരിച്ചത്. മകന്റെ മരണം അറിഞ്ഞതിന് പിന്നാലെ അമ്മ മേരി തലകറങ്ങി വീഴുകയായിരുന്നു. ഉടനെ ചാലക്കുടിയിലെ സ്വകാര്യ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ബിനോയിയുടെ മരണവിവരം അറിഞ്ഞതിനു പിന്നാലെ രക്തസമ്മര്‍ദ്ദം കൂടി തല കറങ്ങി വീണതിനെ തുടര്‍ന്ന് ഞരമ്പ് പൊട്ടിയതാണ് മരണ കാരണം. ബിനോയ് പെയിന്ററുമാണ്. ജിനറ്റ് ആണ് ബിനോയിയുടെ ഭാര്യ. മകന്‍: സാമുവല്‍. മേരിയുടെ മറ്റുമക്കള്‍: ഡെമിസ്ട്രി, ബ്രിട്ടോ, ഫ്രാങ്ക്‌ളിന്‍. മരുമകള്‍: നിഷ(മാള സെന്റ് സ്റ്റനിസ്ലാവോസ് ഫൊറോന പള്ളി ജീവനക്കാരി). ഇരുവരുടെയും സംസ്‌ക്കാരം നാളെ രാവിലെ 10ന് മാള സെന്റ് സ്റ്റനിസ്ലാവോസ് ഫൊറോന ദേവാലയത്തില്‍ നടക്കും.
Mother also died after her son's death