കല്‍പറ്റ: പ്രതിദിനം രണ്ടായിരത്തോളം ആര്‍ടിപിസിആര്‍ ടെസ്റ്റുകള്‍ ചെയ്യാന്‍ കഴിയുന്ന മൊബൈല്‍ ആര്‍ടിപിസിആര്‍ ലാബ് മാനന്തവാടി നല്ലൂര്‍നാട് കാന്‍സര്‍ സെന്ററില്‍ പ്രവര്‍ത്തന സജ്ജമായി. ഉദ്ഘാടനം നാളെ രാവിലെ 10.30ന് ഒ ആര്‍ കേളു എംഎല്‍എ നിര്‍വഹിക്കും. കൊവിഡ് ഫലപ്രദമായി തടയുന്നതിന് കൂടുതല്‍ പരിശോധനാ സംവിധാനങ്ങള്‍ ഒരുക്കുന്നതിന്റെ ഭാഗമായാണ് മൊബൈല്‍ ആര്‍ടിപിസിആര്‍ ലാബ് സജ്ജീകരിക്കുന്നത്. മാനന്തവാടി ബ്ലോക്ക് പഞ്ചായത്തിന് കീഴിലുള്ള അഞ്ച് ഫാമിലി ഹെല്‍ത്ത് സെന്ററിലും, മൂന്ന് കമ്മ്യൂണിറ്റി ഹെല്‍ത്ത് സെന്റര്‍ പരിധിയില്‍ പെട്ടവര്‍ക്ക് ഈ മൊബൈല്‍ ആര്‍ടിപിസിആര്‍ ലാബ് പ്രയോജനകരമാകും. നിലവില്‍ പൂക്കോട് വെറ്ററിനറി കോളജിലും സുല്‍ത്താന്‍ ബത്തേരി പിഎച്ച് ലാബിലുമാണ് ജില്ലയില്‍ സൗകര്യമുള്ളത്. കെഎംഎസ്‌സിഎല്ലിനാണ് മൊബൈല്‍ ലാബുകളുടെ മേല്‍നോട്ട ചുമതല. ലാബിനോട് അനുബന്ധിച്ച് 4 കലക്ഷന്‍ ടീമുകള്‍ ഉണ്ടാവും. മെഡിക്കല്‍ ഓഫിസര്‍മാര്‍ക്കാണ് പരിശോധനകളുടെ ചുമതല.