പാലക്കാട്ട് ദേശീയപാതയ്ക്കരികില്‍ ആയുധങ്ങള്‍ ഉപേക്ഷിച്ചനിലയില്‍ കണ്ടെത്തി
പാലക്കാട്: കണ്ണന്നൂരില്‍ ദേശീയപാതയ്ക്കരികില്‍ ആയുധങ്ങള്‍ ഉപേക്ഷിച്ചനിലയില്‍ കണ്ടെത്തി. നാല് വടിവാളുകളാണ് ചാക്കില്‍കെട്ടിയ നിലയില്‍ കണ്ടെടുത്തത്. വിവരമറിഞ്ഞ് സ്ഥലത്തെത്തിയ പോലിസ് സംഘം ആയുധങ്ങള്‍ കസ്റ്റഡിയിലെടുത്തു. ഫൊറന്‍സിക് സംഘവും പരിശോധന നടത്തി.
ദേശീയപാതയ്ക്ക് സമീപത്തെ പറമ്പിലെത്തിയ തൊഴിലാളികളാണ് ചാക്കില്‍ കെട്ടിയനിലയില്‍ വടിവാളുകള്‍ ആദ്യം കണ്ടത്. തുടര്‍ന്ന് പോലിസില്‍ വിവരമറിയിക്കുകയായിരുന്നു. കഴിഞ്ഞദിവസം നിരവധി ക്രിമിനല്‍ കേസുകളിലെ പ്രതിയായ ആര്‍എസ്എസ് പ്രവര്‍ത്തകനെ അജ്ഞാത സംഘം വെട്ടിക്കൊലപ്പെടുത്തിയിരുന്നു. വെട്ടിക്കൊല്ലാന്‍ ഉപയോഗിച്ച ആയുധങ്ങളാണോ ഇതെന്നും സംശയമുണ്ട്. എന്നാല്‍ ശാസ്ത്രീയ പരിശോധനകള്‍ക്ക് ശേഷമേ ഇക്കാര്യം സ്ഥിരീകരിക്കാനാവുകയുള്ളുവെന്ന് പോലിസ് പറഞ്ഞു.