ഗതാഗത സൗകര്യവും വാഹന സൗകര്യവുമില്ല; അട്ടപ്പാടിയിലെ ഊരു നിവാസികളുടെ ദുരിത ജീവിതത്തിന് പരിഹാരം കാണണം: എസ്ഡിപിഐ

പാലക്കാട്: ഗതാഗത സൗകര്യവും ആവശ്യത്തിന് വാഹന സൗകര്യവുമില്ലാതെ കഷ്ടപ്പെടുന്ന അട്ടപ്പാടിയിലെ ഊരു നിവാസികളുടെ ദുരിത ജീവിതത്തിന് ഇനിയെങ്കിലും ഉടൻ പരിഹാരം കാണണമെന്ന് എസ് ഡി പി ഐ പാലക്കാട് ജില്ലാ കമ്മിറ്റി ആവശ്യപ്പെട്ടു

കഴിഞ്ഞ ദിവസമാണ് അട്ടപ്പാടിയിൽ പ്രസവവേദനയിൽ പുളഞ്ഞ അട്ടപ്പാടി വനത്തിൽ പുതൂർ പഞ്ചായത്തിലെ കടുകുമണ്ണ ഊരിലെ സുമതിയെ ഭർത്താവ് മുരുകനും ഊരുകാരും ചേർന്ന് തുണി മഞ്ചലിൽ തൂക്കുപാലം താണ്ടി കാട്ടു വഴിയിലൂടെ 8 മണിക്കൂറോളം ചുമന്ന് ആംബുലൻസിലെത്തിച്ചത്. 

അട്ടപ്പാടിയിലെ ആദിവാസികളുടെ ജീവിത സൗകര്യങ്ങളുടെ കുറവുകൾ നികത്തുന്നതിനായി ഓരോ വർഷവും കേന്ദ്ര സംസ്ഥാന സർക്കാരുകൾ കോടികളാണ് നീക്കി വെക്കുന്നത് . എന്നിട്ടും ഇവരുടെ ജീവിത സൗകര്യങ്ങൾ മെച്ചപ്പെടുത്താൻ മാറി മാറി വരുന്ന ഇടത് വലത് സർക്കാരുകൾക്ക് കഴിയുന്നില്ല. നീക്കി വെക്കുന്ന കോടികൾ ചിലവഴിച്ച് നടപ്പാക്കുന്ന പദ്ധതികളെ കുറിച്ച് സമഗ്രമായ അന്യോഷണം നടത്തണമെന്നും എസ് ഡി പി ഐ ജില്ലാ കമ്മിറ്റി ആവശ്യപ്പെട്ടു.

സുമതിയെ ആശുപത്രിയിലെത്തിക്കാൻ ആംബുലൻസ് കിട്ടാൻ മണിക്കൂറുകൾ വൈകിയതിനെ കുറിച്ച് ബന്ധുക്കളുടെ ആരോപണവും അന്യോഷിക്കണം.

ജില്ലാ പ്രസിഡണ്ട് ഷെഹീർ ചാലിപ്പുറം അധ്യക്ഷത വഹിച്ചു. ജില്ലാ ജന.സെക്രട്ടറി അലവി കെ ടി, ജില്ലാ കമ്മിറ്റിയംഗങ്ങളായ സക്കീർ ഹുസൈൻ കൊല്ലങ്കോട് , വാസു വല്ലപ്പുഴ, മജീദ് ഷൊർണൂർ ,അലി കെ ടി സംസാരിച്ചു.