മാള: ചാലക്കുടിയില്‍വച്ച് യാത്രക്കാരെ ആക്രമിച്ച് തട്ടിക്കൊണ്ടുപോയ കാര്‍ മാളയില്‍ കണ്ടെത്തി. മാള കോള്‍ക്കുന്നില്‍ ആളൊഴിഞ്ഞ വഴിയില്‍ ഉപേക്ഷിക്കപ്പെട്ട നിലയിലായിരുന്നു കാറ് കിടന്നിരുന്നത്. മൂവാറ്റുപുഴയിലെ വസ്ത്ര വ്യാപാരികള്‍ സഞ്ചരിച്ച വാഹനം കഴിഞ്ഞ ദിവസമാണ് ഒരു സംഘം തട്ടിയെടുത്തത്. ബെംഗളൂരുവില്‍ കച്ചവട ആവശ്യത്തിനായി പോയി മടങ്ങും വഴിയാണ് സംഭവം.
എറണാകുളം ഭാഗത്തേക്കു പോകുന്ന സമയത്ത് മറ്റൊരു കാറിലെത്തിയ അക്രമി സംഘം പാലത്തില്‍വച്ച് വാഹനം തടയുകയായിരുന്നു. ആറ് പേരാണ് അക്രമിസംഘത്തിലുണ്ടായിരുന്നത്. ചുറ്റിക കൊണ്ട് ഡ്രൈവര്‍ ഇരിക്കുന്ന ഭാഗത്തെ ചില്ല് അടിച്ചു തകര്‍ത്ത് യാത്രക്കാരെ പുറത്തിറക്കി മര്‍ദ്ദിച്ച ശേഷമാണ് കാറുമായി കടന്നത്. കുഴല്‍പ്പണം കൊണ്ടുവന്ന കാറാണെന്ന് കരുതി തട്ടിയെടുത്തതാകാമെന്നാണ് പൊലിസ് കരുതുന്നത്. പ്രതികള്‍ക്കായി അന്വേഷണം ഊര്‍ജിതമാക്കി.
കാര്‍ യാത്രക്കാരായ യൂനസ്, മുഹമദ് സാദിഖ് എന്നിവര്‍ക്ക് മര്‍ദ്ദനത്തില്‍ പരിക്കേറ്റിരുന്നു. സിസിടിവി കാമറയുടെ സഹായത്തോടെയാണ് പൊലിസ് അന്വേഷണം നടത്തുന്നത്.