'സാമ്പത്തിക ലോകത്തിന് മായാത്ത സംഭാവനകള്‍ നല്‍കിയ വ്യക്തി'; രാകേഷ് ജുന്‍ജുന്‍വാലയുമൊത്തുളള ഫോട്ടോ പങ്കുവച്ച് പ്രധാനമന്ത്രി

ന്യൂഡല്‍ഹി: അന്തരിച്ച ഓഹരി വ്യാപാരി രാകേഷ് ജുന്‍ജുന്‍വാലക്ക് ആദരാജ്ഞലികള്‍ അര്‍പ്പിച്ച് പ്രധാനമന്ത്രി നരേന്ദ്രമോദി. അദ്ദേഹത്തോടൊപ്പമുള്ള ഫോട്ടോയും പ്രധാനമന്ത്രി ട്വിറ്ററില്‍ പങ്കുവച്ചു.

രാകേഷ് ജുന്‍ജുന്‍വാല അജയ്യനും നര്‍മ്മബോധമുള്ളയാളുമായിരുന്നു. ഉള്‍ക്കാഴ്ചയും വേണ്ടുവോളമുണ്ടായിരുന്നു. അന്തരിച്ച നിക്ഷേപകന്‍ രാകേഷിനെ അനുസ്മരിച്ചുകൊണ്ട് പ്രധാനമന്ത്രി നരേന്ദ്ര മോദി ട്വീറ്റ് ചെയ്തു.

'അദ്ദേഹം ഇന്ത്യയുടെ പുരോഗതിയില്‍ വളരെയധികം അഭിനിവേശമുള്ളയാളായിരുന്നു. അദ്ദേഹത്തിന്റെ വിയോഗം ദുഃഖകരമാണ്. അദ്ദേഹത്തിന്റെ കുടുംബത്തിനും ആരാധകരോടും എന്റെ അനുശോചനം അറിയിക്കുന്നു. ഓം ശാന്തി,' പ്രധാനമന്ത്രി കൂട്ടിച്ചേര്‍ത്തു. 

കോടികളുടെ സമ്പത്ത് സൃഷ്ടിക്കുന്നതിനുള്ള പ്രചോദനമാണ് ജുന്‍ജുന്‍വാലയെന്ന് വാണിജ്യ മന്ത്രി പിയൂഷ് ഗോയല്‍ പറഞ്ഞു.

'മുതിര്‍ന്ന നിക്ഷേപകനായ രാകേഷ് ജുന്‍ജുന്‍വാലയുടെ വിയോഗത്തില്‍ അഗാധമായ വേദനയുണ്ട്. കോടികളുടെ സമ്പത്ത് സൃഷ്ടിക്കുന്നതിന് അദ്ദേഹം പ്രചോദനമായിരുന്നു. അദ്ദേഹത്തിന്റെ കുടുംബത്തിനും സുഹൃത്തുക്കള്‍ക്കും ആരാധകര്‍ക്കും എന്റെ ഹൃദയംഗമമായ അനുശോചനം. ഓം ശാന്തി,' അദ്ദേഹം ഒരു ട്വീറ്റില്‍ പറഞ്ഞു.

ദലാല്‍ സ്ട്രീറ്റിലെ ബിഗ് ബുള്‍ എന്നറിയപ്പെടുന്ന ജുന്‍ജുന്‍വാല, 62ആം വയസ്സില്‍ ഇന്ന് രാവിലെ മുംബൈയിലെ ആശുപത്രിയില്‍ വച്ചാണ് മരിച്ചത്. രാവിലെ 6:45 ഓടെ ബ്രീച്ച് കാന്‍ഡി ഹോസ്പിറ്റലില്‍ എത്തിച്ചെങ്കിലും അതിനും മുമ്പ് മരണം സംഭവിച്ചിരുന്നു.

ഫോര്‍ബ്‌സിന്റെ കണക്കനുസരിച്ച് അദ്ദേഹത്തിന് ഏകദേശം 4000 കോടിയുടെ ആസ്തിയുണ്ട്.