അലോക് കുമാര്‍ വര്‍മ പ്രതിപക്ഷ നേതാവുമായി കൂടിക്കാഴ്ച നടത്തി
സില്‍വര്‍ ലൈന്‍ പദ്ധതിക്കെതിരെ പ്രതിപക്ഷം ശക്തമായ പ്രതിഷേധ പരിപാടികളിലേക്ക് പോകുന്നതിന്റെ പശ്ചാത്തലത്തിലാണ് കൂടിക്കാഴ്ച
തിരുവനന്തപുരം: സില്‍വര്‍ ലൈന്‍ പദ്ധതിയുടെ പ്രാഥമിക സാധ്യതാ പഠനം നടത്തിയ സംഘത്തിന്റെ തലവന്‍ അലോക് കുമാര്‍ വര്‍മ പ്രതിപക്ഷ നേതാവ് വി ഡി സതീശനുമായി കൂടിക്കാഴ്ച നടത്തി. കന്റോണ്‍മെന്റ് ഹൗസിലായിരുന്നു കൂടിക്കാഴ്ച.
സില്‍വര്‍ ലൈന്‍ പദ്ധതിക്കെതിരെ പ്രതിപക്ഷം ശക്തമായ പ്രതിഷേധ പരിപാടികളിലേക്ക് പോകുന്നതിന്റെ പശ്ചാത്തലത്തിലാണ് കൂടിക്കാഴ്ച. വിഡി സതീശനുമായി മികച്ച ചര്‍ച്ചയാണ് നടന്നതെന്നും അലോക് വര്‍മ പ്രതികരിച്ചു. സില്‍വര്‍ ലൈന്‍ ഡി.പി.ആറില്‍ ഒരുപാട് തിരിമറികള്‍ നടന്നു. സില്‍വര്‍ ലൈന്‍ ആദ്യം ബ്രോഡ് ഗേജില്‍ ചെയ്യാനായിരുന്നു തീരുമാനം. സ്റ്റാന്‍ഡേര്‍ഡ് ഗേജ് ആയിരുന്നില്ല. കെ റെയില്‍ പറയുന്നത് അടിമുടി കള്ളമാണെന്നും ഒന്നും വിശ്വസിക്കരുതെന്നും അലോക് വര്‍മ പറഞ്ഞു.
എങ്ങനെ കള്ളം പറയണമെന്ന് കെ റെയിലിനറിയാം തനിക്ക് അത് ബോധ്യമുണ്ട്. സില്‍വര്‍ ലൈന്‍ പദ്ധതി മുഴുവന്‍ നശിപ്പിക്കുന്നത് കെ റെയിലാണെന്നും അലോക് വര്‍മ ആരോപിച്ചു. മുഖ്യമന്ത്രിയുമായും ചീഫ് സെക്രട്ടറിയുമായും കൂടിക്കാഴ്ച നടത്താന്‍ അലോക് വര്‍മ അനുമതി തേടിയെങ്കിലും നിഷേധിക്കപ്പെട്ടിരുന്നു.