കൊവിഡ് രോഗികള്‍ക്ക് മരുന്ന് എത്തിക്കാന്‍ ഹെല്‍പ് ഡെസ്‌ക്കുമായി ഹൈബി ഈഡന്‍ എം പി
കൊച്ചി: എറണാകുളം പാര്‍ലമെന്റ് മണ്ഡലത്തിലെ കൊവിഡ് രോഗികള്‍ക്ക് ആവശ്യമായ മരുന്നുകള്‍ എത്തിക്കുന്നതിന് ഹൈബി ഈഡന്‍ എം. പിയുടെ കൊവിഡ് ഹെല്‍പ്പ് ഡെസ്‌ക്ക് ആരംഭിച്ചു. സമ്പത്തികമായി പിന്നോക്കം നില്‍ക്കുന്നവര്‍ക്കും മരുന്ന് വാങ്ങാന്‍ പരസഹായം ഇല്ലാത്തവര്‍ക്കും ഈ നമ്പറില്‍ വിളിക്കാം. മരുന്നുകള്‍ തികച്ചും സൗജന്യമായാണ് എത്തിച്ചു നല്‍കുന്നത്. കൊവിഡ് പോസിറ്റീവ് രോഗികള്‍ക്ക് മാത്രമാണ് ഈ സേവനം ലഭ്യമാകൂ എന്ന് ഹൈബി ഈഡന്‍ എം. പി പറഞ്ഞു.
കഴിയാവുന്നത്ര ആളുകള്‍ക്ക് മരുന്ന് എത്തിക്കുക എന്നതാണ് ലക്ഷ്യം. ഹൈബി ഈഡന്‍ എം. പിയും നിലവില്‍ കൊവിഡ് പോസിറ്റീവാണ്.
രാവിലെ 9 മുതല്‍ രാത്രി 9 വരെയാണ് ഹെല്‍പ് ഡെസ്‌ക്ക് പ്രവര്‍ത്തിക്കുന്നത്. കൊവിഡ് പോസിറ്റീവ് രോഗികള്‍ വിളിക്കേണ്ട നമ്പര്‍: 04843503177