കൊല്‍ക്കത്ത: ഐഎസ്എല്‍ പത്താം സീസണിലെ വിജയികളെ ഇന്നറിയാം. നിലവിലെ ചാംപ്യന്മാരായ മോഹന്‍ ബഗാന്‍ സൂപ്പര്‍ ജയന്റ്, മുംബൈ സിറ്റി എഫ്‌സിയെ നേരിടും. രാത്രി ഏഴരയ്ക്ക് കൊല്‍ക്കത്ത സാള്‍ട്ട് ലേക്ക് സ്റ്റേഡിയത്തിലാണ് മത്സരം. കിരീടം കാക്കാന്‍ കൊല്‍ക്കത്തന്‍ വമ്പന്മാരായ മോഹന്‍ ബഗാന്‍ സൂപ്പര്‍ ജയന്റ് ഇറങ്ങുമ്പോള്‍ വീണ്ടെടുക്കാനാണ് മുംബൈ സിറ്റി എഫ്‌സി ഇറങ്ങുക.
ഐഎസ്എല്‍ പത്താം പതിപ്പിലെ ഏറ്റവും മികച്ച രണ്ട് ടീമുകളാണ് കലാശക്കളിയില്‍ മുഖാമുഖം എത്തുന്നത്. കപ്പ് നിലനിര്‍ത്തുന്നതിനൊപ്പം ട്രബിള്‍ കിരീടനേട്ടമാണ് മോഹന്‍ ബഗാന്റെ മോഹം. ഡ്യൂറന്റ് കപ്പിനും ഐഎസ്എല്‍ ലീഗ് ഷീല്‍ഡിനുമൊപ്പം ഐഎസ്എല്‍ കിരീടം കൂടി ഷെല്‍ഫിലെത്തിക്കാനായാല്‍ ഈ നേട്ടം സ്വന്തമാക്കുന്ന ആദ്യ ടീമുമാകാം മോഹന്‍ ബഗാന്‍.
ലീഗ് റൌണ്ടിലെ അവസാന കളിയില്‍ ഇതേ സോള്‍ട്ട് ലേക്ക് സ്റ്റേഡിയത്തില്‍ മുംബൈയെ 2-1ന് തോല്‍പ്പിച്ചായിരുന്നു മോഹന്‍ ബഗാന്റെ ഷീല്‍ഡ് നേട്ടം. സ്വന്തം കാണികള്‍ക്ക് മുന്നിലിറങ്ങുന്നത് ഫൈനലിലും ആത്മവിശ്വാസമേകും. ദിമിത്രി പെട്രാറ്റോസ് ജേസണ്‍ കമ്മിങ്‌സ് ജോഡിയിലാണ് മോഹന്‍ ബഗാന്റെ ഗോള്‍ പ്രതീക്ഷകള്‍. ഫൈനലിലേക്ക് നയിച്ച നിര്‍ണായക ഗോള്‍ നേടിയ മലയാളി താരം സഹല്‍ അബ്ദുള്‍ സമദും കൂട്ടിനുണ്ട്.
2020-21 സീസണിലെ പോലെ മോഹന്‍ ബഗാനെ കീഴടക്കി കിരീടം നേടാമെന്ന പ്രതീക്ഷയിലാണ് മുംബൈ സിറ്റി എഫ്‌സി.മുന്‍ ബ്ലാസ്റ്റേഴ്‌സ് താരം ഹോര്‍ഗെ പെരേര ഡിയാസ്, വിക്രം പ്രതാപ് സിങ്, ലാലിയന്‍സുവാല ചാങ്‌തെ എന്നിവരുടെ ബൂട്ടുകള്‍ നിറയൊഴിക്കുമെന്ന പ്രതീക്ഷയിലാണ് മുംബൈ സിറ്റി എഫ്‌സി ഫൈനലില്‍ ഇറങ്ങുക.