മുംബൈ: ഇന്ത്യന്‍ സൂപ്പര്‍ ലീഗ് സെമി ഫൈനല്‍ ആദ്യപാദത്തില്‍ നേടിയ തകര്‍പ്പന്‍ വിജയത്തിനു പിന്നാലെ രണ്ടാം പാദ മത്സരത്തിലും എഫ്സി ഗോവയെ തകര്‍ത്ത് മുംബൈ സിറ്റി എഫ്സി ഫൈനലില്‍. സ്വന്തം മൈതാനത്തു നടന്ന രണ്ടാംപാദ സെമിയില്‍ എതിരില്ലാത്ത രണ്ടു ഗോളുകള്‍ക്കായിരുന്നു മുംബൈയുടെ വിജയം. ആദ്യപാദ മത്സരത്തില്‍ നേടിയ 3-2ന്റെ ജയമടക്കം ഇരുപാദങ്ങളിലുമായി 5-2ന് ഗോവയെ തകര്‍ത്തെറിഞ്ഞാണ് മുംബൈയുടെ ഫൈനല്‍ പ്രവേശനം.
69-ാം മിനിറ്റില്‍ യോര്‍ഗെ പെരെയ്ര ഡിയാസും 83-ാം മിനിറ്റില്‍ ലാലിയന്‍സുവാല ചാങ്തെയുമാണ് മുംബൈയുടെ ഗോളുകള്‍ നേടിയത്. ശനിയാഴ്ച വൈകീട്ട് 7.30-ന് കൊല്‍ക്കത്ത സാള്‍ട്ട്ലേക്ക് സ്റ്റേഡിയത്തില്‍ നടക്കുന്ന ഫൈനലില്‍ കരുത്തരായ മോഹന്‍ ബഗാന്‍ സൂപ്പര്‍ ജയന്റ്സാണ് മുംബൈയുടെ എതിരാളികള്‍.