മലപ്പുറം: പികെ കുഞ്ഞാലിക്കുട്ടി എംപി സ്ഥാനം രാജിവച്ച് സംസ്ഥാന രാഷ്ട്രീയത്തില്‍ സജീവമാകുമെന്നും നിയമസഭാ തിരഞ്ഞെടുപ്പില്‍ മല്‍സരിക്കുമെന്നുമുള്ള പ്രഖ്യാപനം മലപ്പുറം ജനതയോടുള്ള വെല്ലുവിളിയാണെന്ന് എസ്ഡിപിഐ ജില്ലാ പ്രസിഡന്റ് സിപിഎ ലത്തീഫ്.
ഇ അഹമദിന്റെ നിര്യാണത്തെ തുടര്‍ന്ന് മലപ്പുറം ലോകസഭാ മണ്ഡലത്തില്‍ മത്സരിക്കുന്നതിന് വേങ്ങര അസംബ്ലി മണ്ഡലത്തില്‍ നിന്നുള്ള എംഎല്‍എ സ്ഥാനം രാജിവച്ച് മലപ്പുറം ലോക്‌സഭാ മണ്ഡലത്തില്‍ മത്സരിച്ചു. അങ്ങിനെ വേങ്ങരയില്‍ ഉപതിരഞ്ഞെടുപ്പുണ്ടാക്കി. ഫാഷിസത്തെ പിടിച്ചു കെട്ടാന്‍ ഡല്‍ഹിയില്‍ തുടരേണ്ടതുണ്ടെന്ന വാദമുന്നയിച്ചാണ് പൊതു തിരഞ്ഞെടുപ്പില്‍ മലപ്പുറത്ത് നിന്ന് ലോക സഭയിലേക്ക് വീണ്ടും മത്സരിച്ച് ജയിച്ചത്. ഇപ്പോള്‍ വീണ്ടും എംപി. സ്ഥാനം രാജിവെക്കുമെന്ന് പറയുന്നു. ഫാഷിസം ഡല്‍ഹിയില്‍ നിന്നും തിരുവനന്തപുരേത്തക്ക് മാറിയോ എന്ന് ലീഗും കുഞ്ഞാലിക്കുട്ടിയും മറുപടി പറയണം. 2019 ല്‍ യുപിഎ അധികാരത്തില്‍ വരുമെന്നും അങ്ങിനെ കേന്ദ്രത്തില്‍ മന്ത്രിസ്ഥാനം കിട്ടുമെന്നും സ്വപ്നം കണ്ട കുഞ്ഞാലിക്കുട്ടി അത് കിട്ടാതായപ്പോള്‍ 2021 ല്‍ കേരളത്തില്‍ മന്തിയാകാമെന്ന കണക്ക് കൂട്ടലിലാണ്.
2021 ല്‍ യു ഡി.എഫിന് അധികാരം കിട്ടിയില്ലെങ്കില്‍ മലപ്പുറം മുനിസിപ്പാലിറ്റിയില്‍ ലീഗ് കൗണ്‍സിലറെ രാജിവെപ്പിച്ച് മലപ്പുറം മുനിസിപ്പല്‍ ചെയര്‍മാന്‍ സ്ഥാനം കുഞ്ഞാലിക്കുട്ടി ഏറ്റെടുത്തേക്കാവുന്ന അധികാരക്കൊതിക്കാണ് മലപ്പുറം സാക്ഷിയാകേണ്ടി വരിക. ഈ നെറികെട്ട അധികാരഭ്രാന്തിന്നെതിരെ മലപ്പുറം ജനത വിധിയെഴുതുക തന്നെ ചെയ്യും. ലീഗിന്റെ ഫാഷിസ്റ്റ് വിരോധം കേവലം അധര വ്യായാമമാണെന്ന് കുഞ്ഞാലിക്കുട്ടിയും ലീഗും ഒരിക്കലൂടെ തെളിയിച്ചിരിക്കയാണെന്ന് സിപിഎ.ലത്തീഫ് പറഞ്ഞു.