ജയിച്ചാൽ ശമ്പളം നിർദ്ധനരായ കിടപ്പുരോഗികൾക്ക് വാഗ്ദാനം ചെയ്ത് മാളയില്‍ ഒരു സ്ഥാനാർത്ഥി
മാളഃ താൻ ജയിച്ചാൽ തന്റെ അഞ്ചു വർഷത്തെ ശമ്പളം വാർഡിലെ നിർദ്ധനരായ കിടപ്പുരോഗികൾക്ക് പെൻഷനായി നൽകുമെന്ന് എൽ ഡി എഫ് സ്ഥാനാർത്ഥി വി എസ് അച്യുതൻ. മാള ഗ്രാമപഞ്ചായത്തിലെ പതിനാലാം വാർഡിൽ നിന്നാണ് വി എസ് അച്യുതൻ ജനവിധി തേടുന്നത്. കഴിഞ്ഞ വർഷം പോസ്റ്റുമാൻ ആയി റിട്ടയർ ചെയ്തയാണ് അച്യുതൻ.
വാർഡിൽ ഗൃഹ സന്ദർശനം നടത്തിയപ്പോളുണ്ടായ അനുഭവങ്ങളാണ് തന്നെ ഇത്തരമൊരു തീരുമാനമെടുക്കാൻ പ്രേരിപ്പിച്ചതെന്ന് അച്യുതൻ പറഞ്ഞു. ജനങ്ങളോടൊപ്പം നിന്ന് അവരിലൊരാളായി അവരുടെ വിഷമങ്ങൾക്ക് പരിഹാരം ഉണ്ടാക്കേണ്ടതും അവർ നമ്മളിൽ അർപ്പിച്ച വിശ്വാസം കാത്തുസൂക്ഷിക്കേണ്ടതും ഒരു ജനപ്രതിനിധിയുടെ കടമയാണെന്നും അദ്ദേഹം കൂട്ടിച്ചേർത്തു.