തിരഞ്ഞെടുപ്പ് പ്രചാരണം: കൊവിഡ് നെഗറ്റീവെന്ന് ഉറപ്പാക്കുന്നത് അഭികാമ്യം-ഡി.എം.ഒ

തൃശൂർ: പൊതുജനങ്ങളോടുളള ധാർമ്മിക ഉത്തരവാദിത്തം കണക്കിലെടുത്തു കൊണ്ട് സ്ഥാനാർഥികളും സംഘാംഗങ്ങളും ആർ.ടി.പി.സി.ആർ/ആന്റിജൻ ടെസ്റ്റ് നടത്തി കൊവിഡ്-19 നെഗറ്റീവാണ് എന്ന് ഉറപ്പു വരുത്തിയതിനു ശേഷം തിരഞ്ഞെടുപ്പ് പ്രചാരണത്തിന് പോകുന്നതായിരിക്കും അഭികാമ്യമെന്ന് തൃശൂർ ജില്ലാ മെഡിക്കൽ ഓഫീസർ (ആരോഗ്യം) ഡോ. കെ.ജെ. റീന അറിയിച്ചു. മറ്റ് നിർദേശങ്ങൾ:

* തിരഞ്ഞെടുപ്പ് പ്രചാരണത്തിന്റെ ഭാഗമായുളള ഭവന സന്ദർശനത്തിന് ഒരേ സമയം മൂന്ന് പേർ മാത്രമായി നിജപ്പെടുത്താവുന്നതാണ്.

* വീടുകൾ/സ്ഥാപനങ്ങൾ എന്നിവിടങ്ങളിൽ പ്രചാരണത്തിന് പോകുന്നവർ രണ്ട് മീറ്റർ എങ്കിലും അകലം പാലിച്ച് ആളുകളോട് സംസാരിക്കുക.

* വീടുകളിൽ പ്രചാരണത്തിന് പോകുന്നവരും വീട്ടിലുളളവരും നിർബന്ധമായും മാസ്‌ക് ധരിക്കേണ്ടതും സംസാരിക്കുമ്പോൾ ഒരു കാരണവശാലും മാസ്‌ക് താഴ്ത്താൻ പാടില്ലാത്തതുമാണ്.

* പ്രചാരണത്തിന് നോട്ടീസ്/ലഘുലേഖ തുടങ്ങിയ അച്ചടി മാധ്യമങ്ങൾ പരമാവധി ഒഴിവാക്കി, സോഷ്യൽ മീഡിയ കൂടുതലായി ഉപയോഗിക്കേണ്ടതാണ്.

* പൊതുയോഗങ്ങൾ, കുടുംബയോഗങ്ങൾ എന്നിവ ഇടുങ്ങിയ മുറികളിൽ കൂടരുത്. അവ, സാമൂഹിക അകലം പാലിച്ച് ആളുകൾക്ക് ഇരിക്കാവുന്ന തരത്തിൽ വിശാലമായതും വായുസഞ്ചാരമുളളതുമായ ഹാളുകളിൽ നടത്തേണ്ടതാണ്.

* സ്ഥാനാർഥികളും ടീമംഗങ്ങളും സോപ്പും വെളളവും ഉപയോഗിച്ചോ സാനിറ്റൈസർ ഉപയോഗിച്ചോ ഇടക്കിടെ കൈകൾ അണുവിമുക്തമാക്കേണ്ടതാണ്.

* പ്രചാരണത്തിന് പോകുന്നവർ കുട്ടികൾ, ഗർഭിണികൾ, 60 വയസ്സിന് മുകളിലുളളവർ, മറ്റ് അസുഖങ്ങൾ ഉളളവർ എന്നിവരുമായി സമ്പർക്കത്തിലേർപ്പെടുന്നത് ഒഴിവാക്കേണ്ടതാണ്.

* പ്രചാരണത്തിന് പോകുന്നവർ വീടുകൾ, സ്ഥാപനങ്ങൾ എന്നിവിടങ്ങളിൽ അധിക സമയം ചെലവഴിക്കാതിരിക്കുവാൻ ശ്രദ്ധിക്കേണ്ടതാണ്.

* സ്ഥാനാർഥികളും ടീമംഗങ്ങളും വീടുകൾക്കുളളിലേക്ക് പ്രവേശിക്കുന്നതോ, ഹസ്തദാനം പോലുളള പ്രവൃത്തികളിൽ ഏർപ്പെടുന്നതോ ഒഴിവാക്കേണ്ടതാണ്.