മനുഷ്യാവകാശ കമ്മീഷന്‍ സജിതയെയും റഹ്മാനെയും സന്ദര്‍ശിച്ചു: സജിതയുടെ മനുഷ്യാവകാശം ലംഘിക്കപ്പെട്ടോ എന്നന്വേഷിക്കും
തിരുവനന്തപുരം: നെന്മാറയിലെ ഭര്‍തൃവീട്ടില്‍ 11 വര്‍ഷം ഒളിച്ചു താമസിച്ച സജിതയുടെ മനുഷ്യാവകാശങ്ങള്‍ ലംഘിക്കപ്പെട്ടോ എന്ന് സംസ്ഥാന മനുഷ്യാവകാശ കമ്മീഷന്‍ നേരിട്ട് അന്വേഷിക്കും. നെന്മാറയിലെത്തി സജിതയെയും റഹ്മാനെയും റഹ്മാന്റെ മാതാപിതാക്കളെയും നേരിട്ട് കണ്ട് സംസാരിച്ച ശേഷം കമ്മീഷന്‍ ജുഡീഷ്യല്‍ അംഗം കെ ബൈജുനാഥാണ് ഇക്കാര്യം അറിയിച്ചത്. കമ്മീഷന്‍ ഡയറക്ടര്‍ ജനറല്‍ ഓഫ് പോലിസ് (ഇന്‍വെസ്റ്റിഗേഷന്‍) ടോമിന്‍ കെ തച്ചങ്കരിക്കാണ് അന്വേഷണ ചുമതല.
സജിത അനുഭവിച്ചത് മനുഷ്യാവകാശ ലംഘനമാണെന്ന വ്യാപക പരാതിയുടെ പശ്ചാത്തലത്തിലാണ് കമ്മീഷന്‍ സജിതയെയും റഹ്മാനെയും നേരിട്ട് സന്ദര്‍ശിച്ചത്. ഒരു മാസത്തിനകം അന്വേഷണ റിപോര്‍ട്ട് സമര്‍പ്പിക്കാനാണ് കമ്മീഷന്‍ അന്വേഷണ വിഭാഗത്തിന് നല്‍കിയിരിക്കുന്ന നിര്‍ദ്ദേശം. റിപോര്‍ട്ട് കിട്ടിയശേഷം കേസ് പരിഗണിക്കും.