കണ്ണൂര്‍: യുപിയിലെ ലഖിംപൂറില്‍ പ്രതിഷേധിക്കുന്ന കര്‍ഷകര്‍ക്കുമേല്‍ വാഹനമോടിച്ചുകയറ്റി 8 കര്‍ഷകരെ കൊലപ്പെടുത്തിയ സംഭവത്തില്‍ പ്രതിഷേധിച്ച് എസ്‌യുസിഐ(കമ്മ്യൂണിസ്റ്റ്) യുടെയും ആള്‍ ഇന്ത്യ കിസാന്‍ ഖേദ് മസ്ദൂര്‍ സംഘടനയുടെയും നേതൃത്വത്തില്‍ പ്രകടനവും പൊതുയോഗവും സംഘടിപ്പിച്ചു. കലക്ട്രേറ്റില്‍ നിന്നും ആരംഭിച്ച പ്രകടനം കാള്‍ടെക്‌സ് ജംഗ്ഷനില്‍ സമാപിച്ചു. തുടര്‍ന്ന് നടന്ന പ്രതിഷേധയോഗം പ്രമുഖ സാമൂഹ്യ പ്രവര്‍ത്തകന്‍ ഡോ.ഡി സുരേന്ദ്രനാഥ് ഉദ്ഘാടനം ചെയ്തു. 'കേന്ദ്രമന്ത്രിയും ബിജെപി നേതാവുമായ അജയ്കുമാര്‍ മിശ്രയുടെ വാഹനവ്യൂഹത്തില്‍ പെട്ട മന്ത്രിയുടെ മകന്റെ വാഹനമാണ് സമാധാനപരമായി സമരം ചെയ്ത കര്‍ഷകരുടെയിടയിലേക്ക് ഓടിച്ചു കയറ്റിയത്. പലരുടെയും നില ഗുരുതരമാണ്. ഇവരില്‍ പലരും ഐസിയുവിലാണ്. കര്‍ഷക ബന്ദിന് രാജ്യവ്യാപകമായി പിന്തുണ ലഭിച്ചതോടെ പല തരത്തിലുള്ള ആക്രമണങ്ങളാണ് കര്‍ഷകര്‍ക്ക് നേരെ സംഘപരിവാര്‍ അഴിച്ചു വിടുന്നത്. കര്‍ഷകര്‍ക്ക് നേരെയുള്ള ഓരോ ആക്രമണങ്ങളും സംഘപരിവാറിന്റെ ശവക്കുഴി തോണ്ടലായിരിക്കും. കര്‍ഷക സമരം വിജയിക്കേണ്ടത് ഇന്നാട്ടിലെ മുഴുവനാളുകളുടെയും ആവശ്യകതയാണ് എന്ന യാഥാര്‍ത്ഥ്യം നാം തിരിച്ചറിയണം'. ഡോ.ഡി സുരേന്ദ്രനാഥ് പറഞ്ഞു.
എഐകെകെഎംഎസ് സംസ്ഥാന കമ്മിറ്റിയംഗം അനൂപ് ജോണ്‍ അധ്യക്ഷനായി. എസ്‌യുസിഐ(കമ്മ്യൂണിസ്റ്റ്) ജില്ലാ കമ്മിറ്റിയംഗം അഡ്വ.വിവേക് പിസിഎംകെ ജയരാജന്‍, അഡ്വ.ഇ സനൂപ്, രശ്മി രവി എന്നിവര്‍ പ്രസംഗിച്ചു.