മുട്ടപ്പള്ളി: കഴിഞ്ഞ നാല് പതിറ്റാണ്ടിലേറെയായി മുട്ടപ്പള്ളിയുടെ കലാ- കായിക- വിദ്യാഭ്യാസ- സാംസ്‌കാരിക പുരോഗതിക്കായി പ്രവര്‍ത്തിക്കുന്ന സുരഭി സംഘടിപ്പിച്ച സൗഹൃദ സംഗമം വേറിട്ട അനുഭവമായി മാറി. സംഗമത്തിന്റെ ഭാഗമായി സുരഭിയുടെ വളര്‍ച്ചയില്‍ നെടുംതൂണായി നിന്ന മണ്‍മറഞ്ഞ കലാ പ്രവര്‍ത്തകരെ അനുസ്മരിച്ചു. കൂടാതെ കലാ സാംസ്‌കാരിക മേഖലയില്‍ വ്യക്തി മുദ്ര പതിപ്പിച്ച പതിമൂന്ന് കലാകാരന്മാരെ ചടങ്ങില്‍ ആദരിച്ചു. എം കെ ഗോപി, പിഎസ് ചെല്ലപ്പന്‍, എ ജി പ്രസാദ്, തമ്പി ആറ്റിങ്ങല്‍, ചന്ദ്രന്‍ മാറമല, കുട്ടപ്പന്‍ കിണറ്റുകര, കൊച്ചൂട്ടി മരുതിക്കുന്നേല്‍, രാജപ്പന്‍ ഐക്കുഴി, ജോയ് കല്ലമ്മാക്കല്‍, സുരേന്ദ്രന്‍ ആനക്കുഴി, കുട്ടപ്പന്‍ പേഴുത്തോലി, സി ജി രാജു ചൂണ്ടശ്ശേരി എന്നിവരെയാണ് ആദരിച്ചത്.
സുരഭിയെ പ്രതിനിധീകരിച്ച് സംസ്ഥാനത്തിന്റെ വിവിധ മേഖലകളില്‍ മല്‍സരത്തില്‍ പങ്കെടുത്ത് വിജയം കരസ്ഥമാക്കിയ കായിക പ്രതിഭകളെയും സംഗമത്തില്‍ ആദരിച്ചു. വിവിധ കലാപരിപാടികളും അവതരിപ്പിച്ചു. 1982-83 കാലഘട്ടത്തില്‍ ബാലജന സഖ്യം & റേഡിയോ ക്ലബ്ബ് ആയാണ് സുരഭിയുടെ പ്രവര്‍ത്തനം ആരംഭിച്ചത്. പിന്നീട് സംഗീത നാടക അക്കാദമിയുടെ രജിസ്ട്രേഷനോടെ പ്രവര്‍ത്തനം വിപുലീകരിച്ചു. പ്രാദേശിക വികസനം, സന്നദ്ധ സേവന പ്രവര്‍ത്തനങ്ങള്‍, ആരോഗ്യ പ്രവര്‍ത്തനങ്ങള്‍, കലാ-കായിക രംഗം, ഏകാംഗ നാടകങ്ങള്‍, പഞ്ചായത്ത് മേളകള്‍, പ്രഫഷനല്‍ നാടകരംഗം, ഗാനമേളകള്‍ തുടങ്ങി കലാ-സാംസ്‌കാരിക പ്രവര്‍ത്തനങ്ങളുടെ വലിയൊരു പാരമ്പര്യമാണ് സുരഭി കാഴ്ചവെക്കുന്നത്.
മുട്ടപ്പള്ളി ഡിഎഎംയുപി സ്‌കൂളില്‍ നടന്ന സംഗമത്തില്‍ സുരഭി കലാ സമിതി പ്രസിഡന്റ് എം കെ അജയകുമാര്‍ അധ്യക്ഷത വഹിച്ചു. സി കെ രവീന്ദ്രന്‍ സംഗമത്തിന്റെ അവതാരകനും മോഡറേറ്ററുമായിരുന്നു. സെക്രട്ടറി അഡ്വ. കെ പി ഷലിന്‍ കുമാര്‍, ജോയിന്റ് സെക്രട്ടറി വിപിന്‍ ദാസ് കാവുംപാടം, സതീശ് കുമാര്‍ പി ടി, സാബു ചെമ്പില്‍, സുകുമാരന്‍, എം അജയദേവ്, സന്തോഷ് കടപ്ര സംസാരിച്ചു. സംസ്ഥാനത്തിനകത്തു നിന്നും പുറത്തു നിന്നുമായി നിരവധി പേര്‍ പങ്കെടുത്തു.
