ന്യൂഡല്‍ഹി: ഡല്‍ഹി ദ്വാരക ഏരിയയില്‍ യുവാവ് യുവതിയെ കഴുത്തറത്ത് കൊന്നു. കഴിഞ്ഞ ദിവസം രാത്രിയാണ് സംഭവം. 30കാരിയായ വിഭ എന്ന യുവതിയാണ് കൊല്ലപ്പെട്ടത്. പ്രതി ദീപക് എന്നയാളെ നാട്ടുകാര്‍ പിടികൂടി പൊലീസില്‍ ഏല്‍പ്പിച്ചു. നാട്ടുകാരുടെ മര്‍ദ്ദനമേറ്റ ഇയാളുടെ നില ഗുരുതരമാണ്.
കൊലപാതകത്തിന്റെ ദൃശ്യം സിസിടിവിയില്‍ പതിഞ്ഞിട്ടുണ്ട്.വഴിയരികില്‍ നില്‍ക്കുകയായിരുന്നു യുവതി. കൈയില്‍ ബാഗുമായി അക്രമി അടുത്തേക്ക് വരുന്നത് കണ്ട യുവതി ഒഴിഞ്ഞുമാറാന്‍ ശ്രമിച്ചു. യുവതി വടിയുമായി ഇയാളെ പ്രതിരോധിക്കാന്‍ ശ്രമിച്ചെങ്കിലും ഇയാള്‍ കീഴ്‌പ്പെടുത്തി. യുവതിയെ പിടിച്ചു നിര്‍ത്തി കഴുത്തറുത്ത ശേഷം ഇയാള്‍ ഓടി രക്ഷപ്പെടാന്‍ ശ്രമിച്ചു. ഇതോടെ നാട്ടുകാര്‍ പിടികൂടുകയായിരുന്നു. യുവതിയെ തൊട്ടടുത്ത ആശുപത്രിയിലെത്തിച്ചെങ്കിലും രക്ഷിക്കാനായില്ല.
കൊല്ലപ്പെട്ട വിഭയും ഭര്‍ത്താവും ഒരു ചെറിയ പച്ചക്കറിക്കട നടത്തുകയാണ്. കഴിഞ്ഞ ദിവസം പ്രതിയുമായി യുവതി വാക്കുതര്‍ക്കത്തിലേര്‍പ്പെട്ടിരുന്നു. അന്ന് ഇയാള്‍ മദ്യപിച്ചിരുന്നു. ഇതിനെ തുടര്‍ന്നുണ്ടായ വൈരാഗ്യമാണ് കൊലപാതകത്തിലേക്ക് നയിച്ചതെന്ന് പൊലീസ് പറയുന്നു.