കൊച്ചി: പ്രളയവും ഉരുള്‍പൊട്ടലും തകര്‍ത്തുകളഞ്ഞ മൂന്നാറില്‍ പ്രതീക്ഷയുടെ വയലറ്റ് വര്‍ണവുമായി നീലക്കുറിഞ്ഞികള്‍ വിരിഞ്ഞുതുടങ്ങി. പേമാരി ഒഴിഞ്ഞ് ആകാശം തെളിഞ്ഞതോടെ ഇരവികുളം നാഷണല്‍ പാര്‍ക്കിലും കാന്തല്ലൂര്‍ മലനിരകളിലും നീലക്കുറിഞ്ഞികള്‍ പൂവിട്ടുകഴിഞ്ഞു. നീലക്കുറിഞ്ഞികള്‍ കൂടുതല്‍ പൂക്കുന്ന ഇരവികുളം നാഷണല്‍ പാര്‍ക്കിനുള്ളിലെ മലനിരകള്‍ ഏതാനും ദിവസത്തിനുള്ളില്‍ വയലറ്റ് വര്‍ണം അണിയുമെന്നാണ് പ്രതീക്ഷിക്കുന്നതെന്ന് പാര്‍ക്ക് അധികൃതര്‍ പറയുന്നു.
തോരാതെ പെയ്ത മഴ കാരണം രണ്ടുമാസത്തോളം വൈകിയാണ് മൂന്നാറില്‍ നീലക്കുറിഞ്ഞി പൂവിട്ടുതുടങ്ങിയത്. നീലക്കുറിഞ്ഞി പൂക്കുമെന്ന പ്രതീക്ഷയില്‍ ഓഗസ്റ്റ് 15 മുതല്‍ ഇരവിക്കുളം നാഷണല്‍ പാര്‍ക്ക് സഞ്ചാരികള്‍ക്കായി ഒരുക്കിയിരുന്നു. എന്നാല്‍ മഴ നീണ്ടുനിന്നതോടെ നീലകുറിഞ്ഞി പൂവിടാന്‍ വൈകി. ഉരുള്‍പൊട്ടലും പ്രളയവും മൂന്നാറിലേക്കുള്ള പാതകള്‍ തകര്‍ത്തുകളഞ്ഞതോടെ വിനോദ സഞ്ചാരികള്‍ക്ക് പൂര്‍ണമായ വിലക്കാണ് ജില്ലാ ഭരണകൂടം ഏര്‍പ്പെടുത്തിയത്. ഇരവികുളം നാഷണല്‍ പാര്‍ക്കും മൂന്നാറുമായി ബന്ധിപ്പിച്ചിരുന്ന പെരിയവര പാലം തകര്‍ന്നത് പാര്‍ക്കിലേയ്ക്കുള്ള യാത്ര ദുഷ്‌കരമാക്കി.
ഇടുക്കിയിലെ വിനോദ സഞ്ചാരകേന്ദ്രങ്ങളില്‍ ഏര്‍പ്പെടുത്തിയിരുന്ന നിരോധനം കഴിഞ്ഞയാഴ്ച ജില്ലാ കലക്ടര്‍ പിന്‍വലിച്ചതോടെ ചുരംകയറി എത്തുന്ന സഞ്ചാരികളും വര്‍ദ്ധിച്ചു. നീലക്കുറിഞ്ഞിയും വരയാടുകളും മനോഹര കാഴ്ച്ചയൊരുക്കുന്ന ഇരവികുളം നാഷണല്‍ പാര്‍ക്ക്, പുല്‍മേടുകളും തേയിലത്തോട്ടങ്ങളും കുളിരണിയിക്കുന്ന മാട്ടുപ്പെട്ടി, കരിമ്പിന്‍ തോട്ടങ്ങളും ചന്ദനക്കാടുകളും നിറഞ്ഞ മറയൂര്‍. സഞ്ചാരികളെ സ്വീകരിക്കാന്‍ മൂന്നാര്‍ ഒരുങ്ങിക്കഴിഞ്ഞു.