ഇന്ത്യയെ കീഴ്പ്പെടുത്താൻ ഫാഷിസ്റ്റുകളെ അനുവദിക്കില്ല: മുവ്വാറ്റുപുഴ അഷ്റഫ് മൗലവി
രാജ്യത്തെ ജനങ്ങളുടെ മത വിശ്വാസം കാത്ത് സൂക്ഷിച്ചുകൊണ്ട്‌ രാജ്യത്ത് ജീവിക്കാനുള്ള സ്വാതന്ത്ര്യവും, അവകാശവും, സാഹചര്യവും പരിരക്ഷിക്കപ്പെടണം.
പാലക്കാട്: മതേതര ഇന്ത്യയെ കീഴ്പ്പെടുത്താൻ ഫാഷിസ്റ്റുകളെ അനുവദിക്കുകയില്ലന്ന് എസ്ഡിപിഐ സംസ്ഥാന പ്രസിഡന്റ് മുവ്വാറ്റുപുഴ അഷ്റഫ് മൗലവി പറഞ്ഞു. എസ്ഡിപിഐയിൽ പുതിയതായി അംഗത്വമെടുത്തവർക്ക് പാലക്കാട് മണ്ഡലം കമ്മിറ്റി ഒലവക്കോട് സെൻററിൽ സംഘടിപ്പിച്ച സ്വീകരണവും പൊതുസമ്മേളനവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജ്യത്തെ ജനങ്ങളുടെ മത വിശ്വാസം കാത്ത് സൂക്ഷിച്ചുകൊണ്ട്‌ രാജ്യത്ത് ജീവിക്കാനുള്ള സ്വാതന്ത്ര്യവും, അവകാശവും, സാഹചര്യവും പരിരക്ഷിക്കപ്പെടണം. ഇതോടപ്പം മതേതര സംവിധാനങ്ങളും സംരക്ഷിക്കപ്പെടണം. ഇന്ത്യാ രാജ്യത്തിൻ്റെ ഭരണഘടന ഉയർത്തിപ്പിടിച്ച് കൊണ്ട് ഈ വൈദേശിക ദേശവിരുദ്ധ സംവിധാനത്തെ വോട്ടിലൂടെ പുറത്താക്കാൻ താമസിയാതെ കഴിയുക തന്നെ ചെയ്യുമെന്ന് അദ്ദേഹം പറഞ്ഞു.
ജില്ല പ്രസിഡന്റ് ഷെഹീർ ചാലിപ്പുറം, വിമൺ ഇന്ത്യ മൂവ്മെൻ്റ് പാലക്കാട് ജില്ല പ്രസിഡന്റ് അഷിത നജീബ് എന്നിവർ അഭിവാദ്യമർപ്പിച്ച് സംസാരിച്ചു. പാലക്കാട് മണ്ഡലം കമ്മിറ്റി പ്രസിഡന്റ് ഇൽയാസ് കാവൽപ്പാട് അധ്യക്ഷത വഹിച്ചു. മണ്ഡലം കമ്മിറ്റി സെക്രട്ടറി നസീർ സ്വാഗതവും, മുൻസിപ്പൽ കമ്മറ്റി പ്രസിഡന്റ് അബ്ദുൾ ജബ്ബാർ നന്ദിയും പറഞ്ഞു.