പാന്‍ ആധാറുമായി ബന്ധിപ്പിക്കാനുള്ള സമയം നീട്ടി
പാനും ആധാറും തമ്മില്‍ ബന്ധിപ്പിക്കുന്നതിനുള്ള അവസാന തിയ്യതി ഡിസംബര്‍ 31വരെ നീട്ടിയതായി കേന്ദ്ര ധനമന്ത്രാലയം അറിയിച്ചു.
ന്യൂഡല്‍ഹി: പാന്‍ കാര്‍ഡും ആധാര്‍ കാര്‍ഡും തമ്മില്‍ ബന്ധിപ്പിക്കുന്നതിനുള്ള അവസാന തിയ്യതി മൂന്ന് മാസം നീട്ടി. പാനും ആധാറും തമ്മില്‍ ബന്ധിപ്പിക്കുന്നതിനുള്ള അവസാന തിയ്യതി ഡിസംബര്‍ 31വരെ നീട്ടിയതായി കേന്ദ്ര ധനമന്ത്രാലയം അറിയിച്ചു. രണ്ട് കാര്‍ഡുകളും തമ്മില്‍ ബന്ധിപ്പിക്കുന്ന തിയ്യതി ഇത് ഏഴാം തവണയാണ് സര്‍ക്കാര്‍ നീട്ടിനല്‍കുന്നത്. ഈ വര്‍ഷം മാര്‍ച്ചിലാണ് അവസാനമായി തിയ്യതി നീട്ടിയത്. സപ്തംബര്‍ 30വരെയാണ് അന്ന് നീട്ടിയത്.
ആധാര്‍ പദ്ധതി ഭരണഘടനാപരമായി സാധുവാണെന്നും ഇന്‍കം ടാക്‌സ് റിട്ടേണ്‍ സമര്‍പ്പിക്കുമ്പോഴും പാന്‍ കാര്‍ഡ് അനുവദിക്കുമ്പോഴും ആധാര്‍ നമ്പര്‍ നിര്‍ബന്ധമാണെന്നും സുപ്രിംകോടതി കഴിഞ്ഞ വര്‍ഷം സപ്തംബറില്‍ ഉത്തരവിട്ടിരുന്നു.