ശ്രീലങ്കന്‍ സ്‌ഫോടനവുമായി ബന്ധപ്പെട്ടവരാരും കശ്മീര്‍ സന്ദര്‍ശിച്ചിട്ടില്ലെന്നു പോലിസ് മേധാവി
ശ്രീനഗര്‍: ഈസ്റ്റര്‍ ദിനത്തില്‍ ശ്രീലങ്കയില്‍ സ്‌ഫോടനം നടത്തിയവരാരും കശ്മീര്‍ സന്ദര്‍ശിച്ചിട്ടില്ലെന്നു ജമ്മു കശ്മീര്‍ പോലിസ് മേധാവി ദില്‍ബാഗ് സിങ്. സ്‌ഫോടനം നടത്തിയവര്‍ കശ്മീര്‍ സന്ദര്‍ശിച്ചിരുന്നുവെന്നു നേരത്തെ ശ്രീലങ്കന്‍ സൈനിക മേധാവി ലഫ്. ജനറല്‍ മഹേഷ് സേനാനായക് പറഞ്ഞിരുന്നു. ഈ പശ്ചാത്തലത്തിലാണ് ജമ്മുകശ്മീര്‍ ഡിജിപിയുടെ വിശദീകരണം.
ശ്രീലങ്കയില്‍ സ്‌ഫോടനം നടത്തിയവരാരും കശ്മീര്‍ സന്ദര്‍ശിച്ചിട്ടില്ല. ഇത്തരത്തിലുള്ള യാതൊരു വിവരവും ശ്രീലങ്കന്‍ അധികൃതര്‍ കൈമാറിയിട്ടുമില്ല. ആക്രമണത്തിനു ശേഷവും തങ്ങള്‍ വിശദ പരിശോധന നടത്തി. അക്രമികള്‍ ഇവിടം സന്ദര്‍ശിച്ചതിനു യാതൊരു തെളിവുമില്ല. ഇത്തരത്തിലെന്തെങ്കിലും വിവരങ്ങള്‍ ഉണ്ടെങ്കില്‍ കൈമാറാന്‍ ശ്രീലങ്കന്‍ അധികൃതര്‍ തങ്ങള്‍ക്കു കൈമാറണമെന്നും ഡിജിപി ആവശ്യപ്പെട്ടു.