ജമ്മുകശ്മീര്‍: ജയ്‌ശെ മുഹമ്മദ് കമാന്‍ഡര്‍ ഏറ്റുമുട്ടലില്‍ കൊല്ലപ്പെട്ടതായി പോലിസ്
ഷോപിയാന്‍: ദക്ഷിണ കശ്മീരിലെ ജയ്‌ശെ മുഹമ്മദ് കമാന്‍ഡര്‍ മുന്നാ ലാഹോരി സുരക്ഷാ സേനയുമായുള്ള ഏറ്റുമുട്ടലില്‍ കൊല്ലപ്പെട്ടതായി ജമ്മുകശ്മീര്‍ പോലിസ് അറിയിച്ചു. ഷോപിയാനില്‍ കഴിഞ്ഞ ദിവസം രാത്രി മുഴുവന്‍ നീണ്ടുനിന്ന ഏറ്റുമുട്ടലില്‍ ലാഹോരിയുടെ കൂടെയുള്ളയാളും കൊല്ലപ്പെട്ടുവെന്നും ഇരുവരില്‍ നിന്നും നിരവധി സ്‌ഫോടക വസ്തുക്കളും തോക്കുകളും കണ്ടെടുത്തുവെന്നും പോലിസ് അറിയിച്ചു.
പാക് സ്വദേശിയായ ലാഹോരി സ്‌ഫോടക വസ്തുക്കളുടെ നിര്‍മാണത്തില്‍ വൈദഗ്ദ്യം നേടിയ വ്യക്തിയും നിരവധി സ്ഥലങ്ങളില്‍ സ്‌ഫോടനം നടത്തിയ വ്യക്തിയുമാണ്. മാര്‍ച്ച് 30നു ബനിഹാലിലും ജൂണ്‍ 17നു പുല്‍വാമയിലും സൈനിക വാഹനങ്ങള്‍ക്കു നേര ആക്രമണം നടത്തിയതിന്റെ ആസൂത്രകന്‍ ലാഹോരിയാണെന്നും പോലിസ് അറിയിച്ചു.