നിരവധി മോഷണക്കേസുകളിലെ പ്രതി അറസ്റ്റില്‍
പയ്യോളിയിലെ ഗുഡ്‌വേ ഇലക്ട്രോണിക്‌സ്, നെല്ലിയേരി മാണിക്കോത്തെ കോഴിക്കട, തിക്കോടി ഹാര്‍ഡ് വെയര്‍ ഷോപ്പ്, തച്ചന്‍കുന്ന് സൂപ്പര്‍മാര്‍ക്കറ്റ് തുടങ്ങിയ കടകളില്‍ മോഷണം നടത്തിയതും ഇയാള്‍ തന്നെയാണ്.
പയ്യോളി: നിരവധി മോഷണക്കേസുകളില്‍ പ്രതിയായ യുവാവ് അറസ്റ്റിലായി. കണ്ണൂര്‍ ഇരുട്ടി മുഴക്കുന്ന് പറമ്പത്ത് വീട്ടില്‍ മുബാഷിര്‍ (28) ആണ് അറസ്റ്റിലായത്. കോഴിക്കോട് കണ്ണൂര്‍ വയനാട് എന്നീ ജില്ലകളിലായി 12 ലേറെ മോഷണക്കേസുകളിലെ പ്രതിയാണ് ഇയാളെന്ന് പോലിസ് പറഞ്ഞു. പയ്യോളിയിലെ ഗുഡ്‌വേ ഇലക്ട്രോണിക്‌സ്, നെല്ലിയേരി മാണിക്കോത്തെ കോഴിക്കട, തിക്കോടി ഹാര്‍ഡ് വെയര്‍ ഷോപ്പ്, തച്ചന്‍കുന്ന് സൂപ്പര്‍മാര്‍ക്കറ്റ് തുടങ്ങിയ കടകളില്‍ മോഷണം നടത്തിയതും ഇയാള്‍ തന്നെയാണ്.
പല സ്ഥലങ്ങളില്‍ മാറി മാറി താമസിക്കുന്ന പ്രതിയെ കഴിഞ്ഞദിവസം ചെങ്ങോട്ടുകാവ് ചേലിയയിലെ ക്വാര്‍ട്ടേഴ്‌സില്‍നിന്നാണ് പോലിസ് പിടികൂടിയത്. ഷോപ്പുകളിലെ കാമറ ദിശ മാറ്റിവച്ചാണ് കവര്‍ച്ച നടത്തിയിരുന്നത്. തിരിച്ചറിയാതിരിക്കാന്‍ പിപിഇ കിറ്റും ധരിച്ചിരുന്നു. പയ്യോളി സിഐ എം പി ആസാദ്, എസ്‌ഐമാരായ എ കെ സജീഷ്, സി എച്ച് ഗംഗാധരന്‍, എ എസ്‌ഐ ബിനീഷ്, ഒ കെ രഞ്ജിത്ത്, കെ പി രാജീവന്‍, വി സി ബിനീഷ് എന്നിവരുടെ നേതൃത്വത്തിലുള്ള സംഘമാണ് പ്രതിയെ അറസ്റ്റുചെയ്തത്.