കഞ്ചാവുമായി നാലു യുവാക്കള്‍ പോലിസ് പിടിയില്‍
അല്ലപ്ര സ്വദേശി അര്‍ജുന്‍ (20), വളയന്‍ ചിറങ്ങര സ്വദേശികളായ അഭി (24), അക്ഷയ് (24), റിച്ചാര്‍ഡ് (19) എന്നിവരെയാണ് എറണാകുളം റൂറല്‍ ജില്ലയിലെ ഡിസ്ട്രിക്റ്റ് ആന്റി നാര്‍ക്കോട്ടിക്ക് സ്‌പെഷ്യല്‍ ആക്ഷന്‍ ഫോഴ്‌സും, കുന്നത്തുനാട് പോലിസും ചേര്‍ന്ന് പിടികൂടിയത്
കൊച്ചി: കഞ്ചാവ് വലിച്ചു കൊണ്ടു നിന്ന യുവാക്കളെ പോലിസ് ഓടിച്ചിട്ട് പിടികൂടി. അല്ലപ്ര സ്വദേശി അര്‍ജുന്‍ (20), വളയന്‍ ചിറങ്ങര സ്വദേശികളായ അഭി (24), അക്ഷയ് (24), റിച്ചാര്‍ഡ് (19) എന്നിവരെയാണ് എറണാകുളം റൂറല്‍ ജില്ലയിലെ ഡിസ്ട്രിക്റ്റ് ആന്റി നാര്‍ക്കോട്ടിക്ക് സ്‌പെഷ്യല്‍ ആക്ഷന്‍ ഫോഴ്‌സും, കുന്നത്തുനാട് പോലിസും ചേര്‍ന്ന് പിടികൂടിയത്. ഇവരില്‍ നിന്ന് നാല് പൊതികളില്‍ നിന്നായി ഇരുപത്തിയഞ്ചു ഗ്രാം കഞ്ചാവും കണ്ടെടുത്തതായി പോലിസ് പറഞ്ഞു.
എറണാകുളം റൂറല്‍ ജില്ലാ പോലിസ് മേധാവി കെ കാര്‍ത്തിക്കിന് ലഭിച്ച രഹസ്യ വിവരത്തെ തുടര്‍ന്ന് സ്ഥലവും, കഞ്ചാവ് ഉപയോഗിക്കുന്നവരും പോലീസിന്റെ നിരീക്ഷണത്തിലായിരുന്നു. ഐരാപുരത്തുള്ള അക്വഡേറ്റും പരിസരവുമാണ് ഇവരുടെ താവളം. അര്‍ജുനന്‍ ആണ് കഞ്ചാവ് കൊണ്ടുവന്നത്. ഒരു പൊതിക്ക് 500 രൂപ വച്ചാണ് വില്‍ക്കുന്നത്. പോലീസ് വരുന്നതു കണ്ട് ഓടിരക്ഷപ്പെടാന്‍ ശ്രമിച്ചെങ്കിലും ഓടിച്ച് പിടികൂടുകയായിരുന്നു.