താൻ നിരീക്ഷണത്തിലോ ക്വാറന്റൈനിലോ അല്ല: ബിജിമോൾ എംഎൽഎ
കൊവിഡ് രോഗികളുമായി നേരിട്ട് ബന്ധപ്പെട്ടിട്ടില്ലെന്നും നിലവിൽ പ്രചരിക്കുന്ന വാർത്തകൾ ശരിയല്ലെന്നും അവർ പറഞ്ഞു.
ഇടുക്കി: കൊവിഡ് നിരീക്ഷണത്തിൽ കഴിയുകയാണെന്ന വാർത്ത നിഷേധിച്ച് ഇ എസ് ബിജിമോൾ എംഎൽഎ. കൊവിഡ് രോഗികളുമായി നേരിട്ട് ബന്ധപ്പെട്ടിട്ടില്ലെന്നും നിലവിൽ പ്രചരിക്കുന്ന വാർത്തകൾ ശരിയല്ലെന്നും അവർ പറഞ്ഞു.
ഫേസ്ബുക്കിലൂടെയായിരുന്നു എൽഎൽഎയുടെ പ്രതികരണം. നിലവിൽ താൻ നിരീക്ഷണത്തിലോ, ക്വാറന്റൈനിലോ അല്ല. രോഗം സ്ഥിരീകരിച്ച ഡോക്ടറുമായി യാതൊരു വിധത്തിലും നേരിട്ട് ബന്ധപ്പെട്ടിട്ടില്ല. ആളുകളെ പരിഭ്രാന്തിയിലാക്കുന്ന ഇത്തരം വാർത്തകൾ പടർത്തരുതെന്നും ബിജിമോൾ അഭ്യർഥിച്ചു.
രോഗം സ്ഥിരീകരിച്ച ഏലപ്പാറ പ്രാഥമിക ആശുപത്രിയിലെ ഡോക്ടറുമായി ബിജിമോൾ സമ്പർക്കം പുലർത്തിയിരുന്നുവെന്നും ഇതിനാലാണ് എംഎൽഎ നിരീക്ഷണത്തിൽ കഴിയുന്നതെന്നും മന്ത്രി എം എം മണിയാണ് നേരത്തെ അറിയിച്ചിരുന്നത്.