ജൂനിയര്‍ ഫ്രന്റ്‌സ് ഡേ ഇന്ന്; ഒരുമാസം നീളുന്ന മെംബര്‍ഷിപ്പ് കാംപയിന്‍ സംഘടിപ്പിക്കും
കോഴിക്കോട്: ജൂനിയര്‍ ഫ്രന്റ്‌സ് സംസ്ഥാന വ്യാപകമായി സപ്തംബര്‍ 13 ജൂനിയര്‍ ഫ്രന്റ്‌സ് ഡേ ആയി ആചരിക്കും. ഏഴ് വയസ് മുതല്‍ 13 വയസ് വരെയുള്ള കുട്ടികളെ മൂല്യബോധമുള്ള പുതുതലമുറയാക്കി മാറ്റുന്നതിനുള്ള പ്രവര്‍ത്തനമാണ് ജൂനിയര്‍ ഫ്രന്റ്‌സ് നടത്തിക്കൊണ്ടിരിക്കുന്നത്. ഇതിന്റെ ഭാഗമായി സപ്തംബര്‍ 13 മുതല്‍ ഒക്ടോബര്‍ 13 വരെ മൂല്യബോധമുള്ള പുതുതലമുറയ്ക്കായി എന്ന സന്ദേശം ഉയര്‍ത്തി മെംബര്‍ഷിപ്പ് കാംപയിന്‍ സംഘടിപ്പിക്കും.
സംസ്ഥാന പ്രസിഡന്റ് അഹ്മദ് നജ്ജാദ് സംസ്ഥാനതല മെംബര്‍ഷിപ്പ് കാംപയിന്‍ ഉദ്ഘാടനം ചെയ്യും. ജൂനിയര്‍ ഫ്രന്റ്‌സ് ഡേ സന്ദേശം, യൂനിറ്റുകളില്‍ ഒത്തുചേരല്‍, സേവനപ്രവര്‍ത്തനങ്ങള്‍ തുടങ്ങിയ പരിപാടികള്‍ കൊവിഡ് പശ്ചാത്തലത്തില്‍ സാധ്യമാവുന്ന സ്ഥലങ്ങളില്‍ നിര്‍വഹിക്കുമെന്നും സംസ്ഥാന കമ്മിറ്റി അറിയിച്ചു. നാടിന് മാതൃകയാവുന്ന തരത്തില്‍ വിദ്യാര്‍ഥി സമൂഹത്തെ വാര്‍ത്തെടുക്കുന്നതിന് എല്ലാ കൂട്ടുകാരും ജൂനിയര്‍ ഫ്രന്റ്‌സില്‍ അംഗമാവണമെന്ന് സംസ്ഥാന ജനറല്‍ സെക്രട്ടറി ആലിയ സുധീര്‍ വാര്‍ത്താക്കുറിപ്പില്‍ അറിയിച്ചു.