കല്‍പ്പറ്റ: മുത്തങ്ങ അതിര്‍ത്തിയില്‍ വ്യാജ പാസുമായി എത്തിയ യാത്രക്കാരനെ പോലിസ് അറസ്റ്റ് ചെയ്തു . മലപ്പുറം ചുങ്കത്തറ സ്വദേശി അഖില്‍ ടി റെജിയാണ് പരിശോധനക്കിടെ പോലിസിന്റെ പിടിയിലായത് . തലപ്പാടി വഴി കടക്കാനായി ലഭിച്ച പാസ് കമ്പ്യൂട്ടറില്‍ എഡിറ്റ് ചെയ്ത് മുത്തങ്ങ വഴി ആക്കിയാണ് ഇയാള്‍ എത്തിയത്. പാസിലെ ഡേറ്റും എഡിറ്റ് ചെയ്തതായും ഉദ്യോഗസ്ഥര്‍ കണ്ടെത്തി .
സുല്‍ത്താന്‍ ബത്തേരി പോലിസ് ആണ് ഇയാള്‍ക്കെതിരേ കേസെടുത്തിരിക്കുന്നത് . അതിര്‍ത്തി കടന്ന് പരിശോധനാ കേന്ദ്രത്തില്‍ വച്ചാണ് രേഖയില്‍ തട്ടിപ്പ് നടത്തിയതായി പോലിസിന് മനസിലായത്. ഇയാള്‍ക്കെതിരെ പകര്‍ച്ചവ്യാധി നിയമപ്രകാരവും വ്യാജരേഖ ചമക്കല്‍ എന്നീ കുറ്റങ്ങള്‍ ചുമത്തുമെന്ന് അധികൃതര്‍ അറിയിച്ചു . നേരത്തെ അതിര്‍ത്തിയില്‍ പാസില്ലാതെ എത്തിയ രണ്ടുപേരെ തിരിച്ചയച്ചിരുന്നു. പാസില്ലാതെ എത്തുന്നവരെ അതിര്‍ത്തി കടക്കാന്‍ അനുവദിക്കില്ലെന്ന നിലപാടില്‍ ഉറച്ചുനില്‍ക്കുകയാണ് സംസ്ഥാന സര്‍ക്കാര്‍.