ഓണത്തിന് വ്യാജമദ്യം തടയാന്‍ സ്പെഷ്യല് ഡ്രൈവ്; പരിശോധന ഊര്‍ജിതമാക്കി എക്സൈസ്
പോലിസ്, വനം, റെയില്‍വേ, റവന്യൂ ഉദ്യോഗസ്ഥരും നടപടികളില്‍ പങ്കാളികളാവും. എക്സൈസ് സര്‍ക്കിളുകള്‍ കേന്ദ്രീകരിച്ച് സ്ട്രൈക്കിങ് ഫോഴ്‌സിന്റെ പ്രവര്‍ത്തനം സജീവമാക്കിയിട്ടുണ്ട്.
കോട്ടയം: എക്സൈസ് വകുപ്പിന്റെ നേതൃത്വത്തില്‍ ഓണം സ്പെഷ്യല് ഡ്രൈവ് പരിശോധന ആരംഭിച്ചു. ജില്ലാ കലക്ടര്‍ എം അഞ്ജനയുടെ അധ്യക്ഷതയില്‍ ചേര്‍ന്ന യോഗത്തിലെ തീരുമാനത്തിന്റെ അടിസ്ഥാനത്തിലാണ് വ്യാജമദ്യത്തിന്റെയും ലഹരി വസ്തുക്കളുടെയും നിര്‍മാണവും വിപണനവും തടയുന്നതിനുള്ള നടപടികള്‍ വ്യാപകമാക്കിയത്. പോലിസ്, വനം, റെയില്‍വേ, റവന്യൂ ഉദ്യോഗസ്ഥരും നടപടികളില്‍ പങ്കാളികളാവും. എക്സൈസ് സര്‍ക്കിളുകള്‍ കേന്ദ്രീകരിച്ച് സ്ട്രൈക്കിങ് ഫോഴ്‌സിന്റെ പ്രവര്‍ത്തനം സജീവമാക്കിയിട്ടുണ്ട്.
ജലാശയങ്ങള്‍ക്കു സമീപമുള്ള ഒറ്റപ്പെട്ട പ്രദേശങ്ങള്‍, ഒഴിഞ്ഞുകിടക്കുന്ന കെട്ടിടങ്ങള്‍, അന്തര്‍സംസ്ഥാന തൊഴിലാളികളുടെ ക്യാംപുകള്‍ തുടങ്ങിയ സ്ഥലങ്ങളില്‍ പ്രത്യേക നിരീക്ഷണമുണ്ടാവും. കള്ളുഷാപ്പുകള്‍, ബിയര്‍ പാര്‍ലറുകള്‍, വിദേശ മദ്യഷോപ്പുകള്‍ എന്നിവിടങ്ങളിലും പരിശോധന നടത്തും. കള്ളിന്റെ സാംപിളുകള്‍ എല്ലാ ദിവസവും മൊബൈല്‍ ലാബില്‍ പരിശോധിക്കും. കോട്ടയം എക്സൈസ് ഡിവിഷന്‍ ഓഫിസില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം ആരംഭിച്ചിട്ടുണ്ട്. പൊതുജനങ്ങള്‍ക്ക് പരാതികള്‍ കണ്‍ട്രോള്‍ റൂമിലും എക്സൈസ് സര്‍ക്കിള്‍ ഓഫിസുകളിലും അറിയിക്കാം. ഫോണ്‍ നമ്പരുകള്‍ ചുവടെ:
കണ്‍ട്രോള്‍ റൂം- 0481 2562211,18004252818
സര്‍ക്കിള്‍ ഓഫിസുകള്‍
കോട്ടയം - 0481 2583091, 9400069508
ചങ്ങനാശ്ശേരി -0481 2422741, 9400069509,
പൊന്‍കുന്നം -04828 221412, 9400069510
പാലാ-04822 212235, 9400069511
വൈക്കം - 04829 231592, 9400069512