യുഎഇ കോൺസുലേറ്റ് അറ്റാഷെയുടെ ഗണ്‍മാനെ ആത്മഹത്യയ്ക്ക് ശ്രമിച്ചനിലയിൽ കണ്ടെത്തി

തിരുവനന്തപുരം: ഇന്നലെ മുതൽ കാണാതായ യുഎഇ കോൺസുലേറ്റ് അറ്റാഷെയുടെ ഗൺമാനെ കണ്ടെത്തി. കൈ ഞരമ്പ് മുറിച്ച നിലയിലാണ് എആർ ക്യാമ്പിലെ പോലിസുകാരനായ ജയ്ഘോഷിനെ ആക്കുളത്തെ വീടിന് സമീപത്തുനിന്ന് കണ്ടെത്തിയത്. പോലിസ് ഇയാളെ ആശുപത്രിയിലേക്ക് മാറ്റി.

വട്ടിയൂർക്കാവിൽ ഭാര്യയ്ക്കും മക്കൾക്കും ഒപ്പം താമസിക്കുന്ന ജയ്ഘോഷ് കുടുംബത്തെ വ്യാഴാഴ്ച വൈകീട്ടാണ് കരിമണലിലെ കുടുംബ വീട്ടിലേക്ക് മാറ്റിയത്. കൂടാതെ അനുവദിച്ചിരുന്ന പിസ്റ്റൾ ഇയാൾ വട്ടിയൂർക്കാവ് പോലിസിൽ തിരികെ ഏൽപ്പിച്ചിരുന്നു.

എന്നാൽ ഇന്നലെ മുതൽ ജയ്ഘോഷിനെ കാണാനില്ലെന്ന് കാണിച്ച് ബന്ധുക്കൾ തുമ്പ പോലിസിൽ പരാതി നൽകിയിരുന്നു. ഇന്നലെ രാത്രി മുതൽ ഇയാൾക്കായി തിരച്ചിൽ തുടങ്ങിയിരുന്നു. ഇന്ന് ഉച്ചയോടെയാണ് ഇയാളെ കൈ ഞരമ്പ് മുറിച്ച് രക്തം വാർന്ന അവസ്ഥയിൽ കണ്ടെത്തിയത്. സ്വര്‍ണ്ണക്കടത്ത് കേസില്‍ സ്വര്‍ണം പിടിച്ചെടുത്ത ദിവസമടക്കം ജയഘോഷിനെ സ്വപ്ന വിളിച്ചിരുന്നതായി കണ്ടെത്തിയിരുന്നു.