ജലീബില്‍ മൂന്ന് ഫീല്‍ഡ് ആശുപത്രികള്‍ സ്ഥാപിക്കാനൊരുങ്ങി പ്രതിരോധമന്ത്രാലയം
ആരോഗ്യമന്ത്രാലയവുമായി ഏകോപിച്ചുകൊണ്ട് പ്രദേശത്തെ രോഗബാധിതരെ പരിശോധിക്കാനും ചികില്‍സ ലഭ്യമാക്കാനുമാണ് ഈ ആശുപത്രികള്‍ സ്ഥാപിക്കുന്നത്.
കുവൈത്ത് സിറ്റി: കുവൈത്തില്‍ ജലീബ് അല്‍-ഷുയൂഖ് പ്രദേശത്ത് മൂന്ന് വിദ്യാലയങ്ങളിലായി ഫീല്‍ഡ് ആശുപത്രികള്‍ സ്ഥാപിക്കുന്നതിന് പ്രതിരോധമന്ത്രാലയം തയ്യാറെടുക്കുന്നു. ആരോഗ്യമന്ത്രാലയവുമായി ഏകോപിച്ചുകൊണ്ട് പ്രദേശത്തെ രോഗബാധിതരെ പരിശോധിക്കാനും ചികില്‍സ ലഭ്യമാക്കാനുമാണ് ഈ ആശുപത്രികള്‍ സ്ഥാപിക്കുന്നത്.
കൊറോണ വൈറസിനെതിരേ ആരോഗ്യമന്ത്രാലയം നടത്തുന്ന പ്രതിരോധപ്രവര്‍ത്തനങ്ങള്‍ക്കുള്ള പിന്തുണയുടെ ഭാഗമായാണ് ഇതെന്ന് പ്രതിരോധമന്ത്രാലയ വൃത്തങ്ങള്‍ വ്യക്തമാക്കി. ഇതിനു പുറമെ ജലീബ് അല്‍- ഷുയൂഖ് പ്രദേശത്തെ മുഴുവന്‍ താമസക്കാരില്‍നിന്നും സാമ്പിളുകള്‍ ശേഖരിച്ച് കൊറോണ വൈറസ് പരിശോധന നടത്താനും തയ്യാറെടുക്കുന്നതായി പ്രാദേശിക ദിനപത്രം റിപോര്‍ട്ട് ചെയ്തു. വിദ്യാഭ്യാസ, പ്രതിരോധ, ആരോഗ്യ, ആഭ്യന്തരമന്ത്രാലയങ്ങള്‍ ഏകോപിച്ചുകൊണ്ടായിരിക്കും ഇവയുടെ പ്രവര്‍ത്തനം നടപ്പാക്കുക.