ദമ്മാം: കൊവിഡ് മഹാമാരി തീര്‍ത്ത ഭയത്തിനും ഒറ്റപ്പെടലിനുമിടയില്‍ ജീവിതം തന്നെ ലോക്ക് ഡൗണിലായി മുറികളില്‍ ഒറ്റപ്പെട്ടുകഴിയുന്ന നിരവധിം പ്രവാസികള്‍ക്ക് തണലാവുകയാണ് സൗദിയുടെ കിഴക്കന്‍ പ്രവിശ്യയുടെ ആസ്ഥാന നഗരമായ ദമ്മാമിലെ ഇന്ത്യന്‍ സോഷ്യല്‍ ഫോറം വോളന്റിയര്‍മാര്‍. ഭക്ഷണക്കിറ്റും വൈദ്യസഹായവും കൗണ്‍സിലിങും ഒക്കെയായി സദാസമയവും സജീവമാണ് ഫോറത്തിന്റെ ജീവകാരുണ്യ വിഭാഗം. ടൊയോട്ട, ഖാലിദിയ്യ, കൊദരിയ തുടങ്ങിയ ദമ്മാം നഗരത്തിന്റെ പ്രാന്തപ്രദേശങ്ങളിലെല്ലാം ഇവരുടെ സഹായമെത്തുന്നുണ്ട്. ദമ്മാം, റയ്യാന്‍ ബ്ലോക്ക് കമ്മിറ്റികള്‍ക്കു കീഴിലുള്ള ഫോറം വോളന്റിയര്‍മാരാണ് ഈ പ്രദേശങ്ങളില്‍ ഭക്ഷ്യ ധാന്യകിറ്റുകളും മരുന്നും എത്തിച്ചുനല്‍കുന്നത്. സോഷ്യല്‍ ഫോറം ബ്ലോക്ക് കമ്മിറ്റി ഭാരവാഹികളായ മന്‍സൂര്‍ ആലംകോട്, സുബൈര്‍ നാറാത്ത്, അലി മാങ്ങാട്ടൂര്‍, മുനീര്‍ കൊല്ലം, അന്‍ഷാദ്, സജീര്‍, ഷറഫുദ്ദീന്‍, റനീഷ്, മുജീബ് എന്നിവരുടെ നേതൃത്വത്തിലാണ് ഹെല്‍പ് ലൈന്‍ ടീം പ്രവര്‍ത്തിക്കുന്നത്. ഫോറത്തിന്റെ ഹെല്‍പ് ലൈന്‍ നമ്പറുകളിലേക്ക് സഹായം അഭ്യര്‍ത്ഥിച്ച് കോളുകള്‍ വരുന്ന മുറയ്ക്ക് മൂന്ന് ടീമായി തിരിഞ്ഞാണ് നിലവില്‍ ഈ മേഖലകളില്‍ കിറ്റുകള്‍ എത്തിക്കുന്നതെന്ന് ഭാരവാഹികള്‍ പറഞ്ഞു.