ഐ പി എല്‍; വരുണിന് അഞ്ച് വിക്കറ്റ്; ഡല്‍ഹിയെ തകര്‍ത്തെറിഞ്ഞ് കൊല്‍ക്കത്ത

അബൂദാബി: ഇന്ത്യന്‍ പ്രീമിയര്‍ ലീഗില്‍ ഡല്‍ഹി ക്യാപ്റ്റില്‍സിനെ തകര്‍ത്തെറിഞ്ഞ് കൊല്‍ക്കത്താ നൈറ്റ് റൈഡേഴ്‌സ്. ഇന്ന് നടന്ന ആദ്യ മല്‍സരത്തില്‍ 195 റണ്‍സ് ലക്ഷ്യവുമായിറങ്ങിയ ഡല്‍ഹിയെ നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 135 റണ്‍സിന് പിടിച്ചുകെട്ടുകയായിരുന്നു. 59 റണ്‍സിന്റെ ജയമാണ് കൊല്‍ക്കത്ത നേടിയത്. അഞ്ച് വിക്കറ്റ് നേടിയ കൊല്‍ക്കത്താ താരം വരുണ്‍ ചക്രവര്‍ത്തിയാണ് ഡല്‍ഹിയുടെ നടുവൊടിച്ചത്. ഡല്‍ഹി നിരയില്‍ ശ്രേയസ് അയ്യര്‍ (47), ഋഷഭ് പന്ത് (27) എന്നിവര്‍ മാത്രമാണ് പിടിച്ചുനിന്നത്. കമ്മിന്‍സ് മൂന്നും ഫെര്‍ഗൂസണ്‍ ഒരു വിക്കറ്റും നേടി.

ടോസ് നേടിയ ഡല്‍ഹി കൊല്‍ക്കത്തയെ ബാറ്റിങിനയക്കുകയായിരുന്നു. ഗില്‍ പെട്ടെന്ന് പുറത്തായെങ്കിലും പിന്നീട് വന്ന നിതീഷ് റാണാ തകര്‍പ്പന്‍ അടിയോടെ കളം വാണു. ഇതിനിടെ വന്ന ത്രിപാട്ടി(13), കാര്‍ത്തിക്ക് (3) എന്നിവര്‍ പെട്ടെന്ന് പുറത്തായി. തുടര്‍ന്ന് റാണയ്ക്ക് (81) കൂട്ട് നല്‍കിയത് സുനില്‍ നരെയ്ന്‍ (64) ആണ്. 53 പന്തില്‍ നിന്നാണ് താരം 81 റണ്‍സെടുത്തത്. 32 പന്ത് നേരിട്ടാണ് നരെയ്ന്‍ 64 റണ്‍സെടുത്തത്.