ഐപിഎല്ലിന് ഇന്ന് തുടക്കം; ജഡേജയുടെ സിഎസ്‌കെയും അയ്യരുടെ കെകെആറും നേര്‍ക്ക് നേര്‍
7.30ന് നടക്കുന്ന മല്‍സരം സ്റ്റാര്‍ സ്‌പോര്‍ട്‌സ് നെറ്റ് വര്‍ക്ക് ചാനലുകളിലും ഡിസ്‌നി പ്‌ളസ് ഹോട്ട്‌സ്റ്റാറിലും കാണാം.
മുംബൈ: മുംബൈ വാംഖഡെ സ്റ്റേഡിയത്തില്‍ ഇന്ന് മുതല്‍ ഐപിഎല്‍ കാര്‍ണിവല്‍. ഉദ്ഘാടന മല്‍സരത്തില്‍ നിലവിലെ ചാംപ്യന്‍മാരായ ചെന്നൈ സൂപ്പര്‍ കിങ്‌സും റണ്ണേഴ്‌സ് അപ്പായ കൊല്‍ക്കത്താ നൈറ്റ് റൈഡേഴ്‌സും തമ്മില്‍ ഏറ്റുമുട്ടും. ഇരുടീമും പുതിയ ക്യാപ്റ്റന്‍മാര്‍ക്ക് കീഴിലാണ് ഇറങ്ങുന്നത്.ഐപിഎല്ലിലെ ചെന്നൈ ആധിപത്യം നിലനിര്‍ത്താന്‍ ജഡേജയും കെകെആറിനെ പുതിയ ഉയരത്തിലെത്തിക്കാന്‍ കെകെആറും ശ്രമിക്കുമ്പോള്‍ മല്‍സരം തീപ്പാറും. ടീമിലെ മിന്നും താരങ്ങളായ ഫഫ് ഡു പ്ലിസ്സിസ്, ശാര്‍ദ്ദുല്‍ ഠാക്കൂര്‍, ജോഷ് ഹാസല്‍വുഡ് എന്നിവര്‍ ഇല്ലാതെ പുതിയ സൈനിങുകളായ ഡെവണ്‍ കോണ്‍വെ, ആദം മില്‍നെ എന്നിവരുമായാണ് ടീം ഇറങ്ങുക. ക്യാപ്റ്റന്‍ ശ്രേയസ് അയ്യര്‍ക്കൊപ്പം നിതീഷ് റാണ, വെങ്കിടേഷ് അയ്യര്‍, സുനില്‍ നരേയ്ന്‍ എന്നിവര്‍ തന്നെയാണ് കെകെആറിന്റെ ഇത്തവണത്തെയും പ്രതീക്ഷ. 7.30ന് നടക്കുന്ന മല്‍സരം സ്റ്റാര്‍ സ്‌പോര്‍ട്‌സ് നെറ്റ് വര്‍ക്ക് ചാനലുകളിലും ഡിസ്‌നി പ്‌ളസ് ഹോട്ട്‌സ്റ്റാറിലും കാണാം.