ട്രന്റ് ബോള്‍ട്ടിന്റെ ന്യൂസിലന്റ് ക്രിക്കറ്റ് കരിയര്‍ അവസാനിക്കുന്നു

വില്ലിങ്ടണ്‍: ഏകദിന ക്രിക്കറ്റിലെ നമ്പര്‍ വണ്‍ ഫാസ്റ്റ് ബൗളറായ ന്യൂസിലന്റിന്റെ ട്രന്റ് ബോള്‍ട്ട് ദേശീയ ക്രിക്കറ്റ് ടീമില്‍ നിന്നും വിട്ടുനില്‍ക്കുന്നു. 33കാരനായ താരം കരാറില്‍ നിന്ന് തന്നെ ഒഴിവാക്കിത്തരണമെന്ന് ന്യൂസിലന്റ് ക്രിക്കറ്റ് ബോര്‍ഡിനോട് ആവശ്യപ്പെട്ടിരിക്കുകയാണ്. ബോര്‍ഡ് ഈ ആവശ്യം അംഗീകരിച്ചിരിക്കുകയാണ്. വിരമിച്ചതിന് തുല്യമാണ് ബോള്‍ട്ടിന്റെ പ്രഖ്യാപനം. എന്നാല്‍ കിവികളുടെ ലോകകപ്പ് ടീമില്‍ താരം ഉണ്ടാവുമെന്ന് ഉറപ്പാണ്. കുടുംബത്തോടൊപ്പം കൂടുതല്‍ സമയം ചെലവഴിക്കാനും ട്വന്റി-20 ലീഗുകളില്‍ ശ്രദ്ധ കേന്ദ്രീകരിക്കാനുമാണ് താരത്തിന്റെ തീരുമാനം. ഏകദിനത്തില്‍ 169ഉം ടെസ്റ്റില്‍ 317ഉം വിക്കറ്റ് ബോള്‍ട്ട് സ്വന്തമാക്കിയിട്ടുണ്ട്. ട്വന്റിയില്‍ 62വിക്കറ്റുകളാണ് നേട്ടം.