യൂറോ കപ്പിന് ഇന്ന് കിക്കോഫ്; ഉദ്ഘാടന മത്സരത്തില്‍ ജര്‍മ്മനി സ്‌കോട്‌ലന്‍ഡിനെതിരേ
ബെര്‍ലിന്‍: ക്ലബ്ബ് മത്സരങ്ങളില്‍ നിന്ന് ഇടവേളയെടുത്തു സൂപ്പര്‍ താരങ്ങള്‍ ഇനി ദേശീയ ടീമുകളുടെ ജഴ്‌സിയിലേക്ക്. യൂറോപ്യന്‍ രാജ്യങ്ങളുടെ പന്തുകളിപ്പോരാട്ടമായ യൂറോ കപ്പിന് ഇന്ന് ജര്‍മനിയില്‍ കിക്കോഫ്. ഇന്ത്യന്‍ സമയം രാത്രി 12.30ന് ആതിഥേയരായ ജര്‍മനിയും സ്‌കോട്ലന്‍ഡും തമ്മിലാണ് ഉദ്ഘാടന മത്സരം. എ ഗ്രൂപ്പിലെ ആദ്യ മത്സരത്തിനു വേദി മ്യൂണിക്കിലെ അലിയാന്‍സ് അരീന സ്റ്റേഡിയമാണ് സോണി സ്‌പോര്‍ട്‌സ് ചാനലുകളിലും സോണി ലിവ് ആപ്പിലും തത്സമയം കാണാം. ജര്‍മനിയിലെ 10 നഗരങ്ങളിലായുള്ള 10 സ്റ്റേഡിയങ്ങളാണ് യൂറോ കപ്പിന്റെ 17ാം പതിപ്പിനു വേദിയാകുന്നത്. ഫൈനല്‍ ജൂലൈ 14ന് ബെര്‍ലിനിലെ ഒളിംപിക് സ്റ്റേഡിയത്തില്‍ നടക്കും.
'ഫുട്ബോളിനാല്‍ ഒരുമിക്കാം, യൂറോപ്പിന്റെ ഹൃദയഭാഗത്ത് ഒരുമിക്കാം' എന്നതാണ് 2024 യൂറോ കപ്പിന്റെ പ്രചാരണ വാക്യം. ടൂര്‍ണമെന്റില്‍ പങ്കെടുക്കുന്ന 24 രാജ്യങ്ങളുടെ പതാകള്‍ ഉള്‍ക്കൊള്ളിച്ചുകൊണ്ടാണു ലോഗോ ഡിസൈന്‍ ചെയ്തിരിക്കുന്നത്.